Shillong, Lber 20 : Ka National People’s Party (NPP) ha ka sngi Balang ka la khyrwit kylla ïa ka Voice of the People’s Party (VPP) da kaba ong ba ka jingkynnoh jong ka VPP ka dei kaba khlem nongrim bad kaba la shu kren bad kynthoh da kaba shu mutdur khlem kano kano ka jingshisha.
“Ka party ka kwah ban pynshai ba ka jingkynthoh da u nongai ktien ka VPP lyngba ki lad pathai khubor kadei tang ka jingkren shu mutdur khlem kino kino ki jingshisha,” ong u Nongai Ktien ka NPP, Meghalaya Bah HM Shangpliang ha ka kyrwoh.
Shuh shuh ka kyrwoh ka ong ba ka NPP ka jop ha ka elekshon MLA ha u 2023 dei na ka jingkyrshan borbah ki paidbah ka jylla da kaba peit ïa ki kam pynroi kiba ka Party ka la leh ha kine ki san snem, kata naduh u 2018 – 2023.
“Mynta ka NPP ka khie rasong dei na ka jingkyrshan jong ki paidbah namar ka nud ban tur bad ïakhun ïa ki ishu kiba la sahteng la slem jong ka jylla ïa kiba la shu ieh shrah kumto. Bad ka party kam shym la heh tang ka nia ban pynbiej ïa ki paidbah,” la bynrap shuh shuh.
La ong ruh ba ka NPP ka trei shitom khnang ba kan ïoh khur ïa ka jingjop kaba donburom ha baroh ar tylli ki parliamentary seat kata ha Shillong bad Tura ha kane ka elekshon MP kaban sa long shen ha ka 19tarik u Ïaiong mynta u snem. Ka kyrwoh na ka party ka ong ruh ba ka party kan ïai bteng ban trei na ka bynta ka roi ka pa jong ki paidbah bad ban pynkylla dur ïa ka jylla sha kaba kham bha.
