Ka VPP kam dei tang ka Seng ba ïakhun election, ka la jop ha ki ar bynta haba ïakhun ïa ka Reservation Policy :Ardent

Nongpoh, Jymmang 21: Haba wan ban pynshai sha ki paidbah ka them Ri Bhoi ha ka jingïalang kaba la long ha ka sngi Saitjaiñ ha ïing Dorbar Hall, Sajer Nongpoh halor ka nongrim treikam jongka party Voice of People Party (VPP), u Bah Ardent Miller Basaïawmoit kum u President ba rangbah ka VPP, u la ong ba ka jingmih ka party VPP kam dei satia ba la seng tang ban ïa khun ïa ka election, hynrei kum ka party ka don ïa ka nongrim ba skhem ban shakri na ka bynta ka daw bah jong ka jaid bynriew bad ban kren halor ki mat ki jura jong ka jaid bynriew ba kum ki trai muluk ki trai jaka kim dei ban long mraw ha la ka jong ka jylla.
U la ong ruh kum u nongïalam ka party VPP u hap ban pynshai sha ki paidbah ba la seng ïa ka party VPP ym tang ban ïa khun na ka bynta ka election, hynrei la seng ïa kane ka party halor ka nongrim ban pynim, pynbha bad saindur ïa ka bha ka miat jong ki paidbah hapoh ka jylla.
“Bun ki seng sain pyrthei hapoh ka jylla ki la pynmih kata ka jingkynnoh ba ka party VPP ka dei tang ka party bai a khun election, hynrei ki paidbah ki sakhi ïa kane ka bynta ha kaba haduh mynta ki paidbah ki ai ka jingkyrshan namar ba ki bishar ïa ka nongrim treikam jong ka party” ong u Bah Ardent Miller Basaïawmoit.
U la pynpaw ruh da kaba ong ba bun ki seng saiñ pyrthei hapoh ka jylla ki la kynnoh pyrshah ba ka party VPP ka ïakhun ïa ka Job Reservation Policy na ka bynta ka election bad kim tip pat ba ka party ka ïa khun pyrshah na ka bynta ka hok jong ki samla ha ka liang ka ioh kam ka ioh jam, ha kaba ka Job Reservation Policy kumba ka long haduh mynta ka noh shiliang bad bun ki samla ki duh nong lada pynïaid katkum kane ka reservation Policy lyngba kata ka Roster System.
U la ong ruh ba ka party VPP kan nym sngap ïa kino kino ki jingkynnoh ne ki jingkyntoh bad kumba la suit la shor ïa ka ban ïa khun na ka bynta ka bha ka miat bad ka roi ka par hapoh ka jylla kan ïaid shaphrang ban kren ïa ki jingeh ki paidbah hapoh ka jylla bad ai ba ki paidbah hi kin bishar ïa ka kam ha kaba kumba long haduh mynta la sakhi ba ki paidbah ki la ai ka jingkyrshan kaba radbah ïa ki kam ba la leh da ka party namar ki sngewthuh shai kdar ba ka party VPP ka dei kata ka party kaba ïa khun shisha na ka bynta ka daw bah jong ka jaid bynriew.
Haba kren halor ka Roster System kaba dei ka bynta ka Job Reservation Policy, u Myntri rangbah ka jylla bad kiwei ki seng sain hima ki la kynnoh ba u Bah Ardent Miller Basaïawmoit u la ïalam bakla ïa ki paidbah bad dei tang ka Hight Court kaba lah ban tuklar ïa kane bad phewse haba ki la phah ïa ka High Court ka High Court ka la pynpaw ba kane ka dei ka kam jong ka sorkar jylla ban ïa pynbeit ïa ka roster system.
U la ong ruh na ka liang ka VPP ka la dawa ruh ban pynsangeh shuwa ïa ka jingthungkam ne ki interview thungkam hapoh ka jylla, u Myntri rangbah bad ka sorkar MDA 2.0 ki la pynpaw ba kim lah ban pynsangeh bad ki hap ban ïaid shaphrang, hynrei hadien mynta pat ki hap ban pynsangeh namar ki la sngewthuh shai ba ka Roster system kam pat bit pat biang bad ka dang don kata ka jingnoh shiliang ha ka liang ka thungkam ka thungjam.
Shuh shuh, u la bynrap ruh da kaba ong, ba ka party VPP kam shym la leh matlah ïa kino kino ki ishu bad shuwa ban ïaid shakhmat ka da bishar bad tohkit bniah bad kum ka Job Reservation Policy bad ka Roster System ruh ka party ka pyrshah jur dei namar ba kam long kaba bit ba biang bad donkam ban pynbit pynbiang bad khmih bniah sshuwa khnang ba kan nym noh shiliang ha ka thungkam ka thungjam ki samla.
Kiba bun ki seng saiñ pyrthei ki la pynmih ki jingkynnoh ba ha rukom halor ka Job Reservation Policy, hynrei ka party VPP ka ieng skhem ha la ka nongrim bad kumba long haduh mynta haba ïakhun ïa ka Job Reservation Policy khamtam ïa ka roster system ha ka VPP ka la jop ha ki ar bynta, kata mynshuwa u Myntri rangbah u la kynnoh ba lada ki kwah ban ïa khun ïa ka roster system ki dei ban leit sha ka ïingbishar bad ruh ba kim lah ban pynsangeh ïa ka thungkam ne ki interview thungkam bad ha mynta pat ka sorkar ka hap ban pyndep ha kaba ïa ki jignthungkam ne ki interview thungkam la pynsangeh bad ruh ba ka ïing bishar jong ka High Court ka la kren shai ba dei ka kam ram jong ka sorkar jylla ban ïa pynbeit ïa ka roster system jong ka job reservation Policy, la bynrap u Bah Ardent Miller Basaïawmoit.