Ka ‘Umsum Pitcher Plant Community Reserve Nongnah’ ka jaka pynneh pynsah ïa u ‘tiew rakot

0

Mawkyrwat, Jymmang 20: Ka shnong Nongnah kaba don ha syndah jong u Lum Iawpaw kaba hap hapoh u pud u sam jong ka South West Khasi Hills District jong ka Ranikor C&RD Block kaba jngai kumba 27 km na Mawkyrwat kaba dei ka headquarter jong ka South West Khasi Hills District ka dei kawei na ki shnong ba ka la shim ïa ka synjam ban pynneh pynsah ïa u ‘tiew rakot ne u nepenthes pitcher plant.
Lah ban kdew ba ha kane ka shnong ki don shibun ki jaka kiba itynnad ki kiba lah ban khring ïa shibun ïa ki nongwan jngohkai pyrthei bad mynta ngin ïa phai sha kawei ka jaka ba la pynneh pynsah ïa u ‘tiew rakot lane u nepenthes pitcher plant. Ïa une u jait syntiew la pynneh pynsah da kawei ka group kaba ngi lah ban tip kum ka ‘Umsum Pitcher Plant Community Reserve Nongnah’ (UPPSRN). Haba hiar bad ïuh kjat ha kane ka jaka ban sakhi ïa kane ka jaka ba la pynneh pynsah ïa u ne u jait syntiew bad la ïoh ruh ban ïa kren bad uwei ‘riew rangbah u ba dei ruh trai jong ka jaka uba long ruh ha kajuh ka por kum u dkhot jong kane ka group UPPSRN.
Katkum ka jingïathuh, lah ban shem ïa ne u jait syntiew tang ha ki kato katne ki bynta jong ka jylla Meghalaya kum ha ki thaiñ Jaiñtia bad ha kine shnong kum ka Umdohlun shaduh Phlangdiloiñ, Nongjri bad Nongnah kiba hap hapoh South West Khasi Hills District. Une u jait syntiew u don 4 jait bad ha la ka jong ki jong ki rong bad ha la ki jong ki dur bad u don ruh tang ha ki katto kattne ki bynta jong ka pyrthei.
Une u syntiew rakot u ju bam ïa ki kynja khñiang kiba her kum ki pyrjong bad kiwei kiwei de ki khñiang, bad hapoh jong u, u don ka um kaba ktang bad ïa ka um jong une u syntiew ngi lah ban pyndonkam kum ka um dawai ha kiba don maw bad ha ki shkor kiba mihksuid hynrei lada pyndonkam ïa ka um na une u syntiew ka dei beit kato ka um kaba dang tap ym kaba la dep plied.
La ong shuh shuh ba ïa une u syntiew rakot, ngi lah ban shem shibun bah ha kane ka jaka kaba ki la pynneh pynsah ïa u bad ka jingheh jong kane ka jaka ka long kumba 45 square akar ei ei nalor une u syntiew ha kane ka jaka ki don ruh ki jaka pynneh pynsah ïa ki dohkha dohpnat, ha kane ka wah umsum ki don ruh ki jaka ïaid kai ki jaka shongkai pynngad ki jingkieng dieng haba kut jong kane ka kper ka don ka jaka kaba itynnad bad pyngngad ka bym pat shna ei ei ïa kaba ka group ka mut ban shna jaka shongpyngngad kaba long ha kut jong ka riat.
Kane ka ‘Umsum pitcher plant Community Reserve Nongnah’ ka don haduh 9 ngut ki dkhot kiba ju peit bad sumar ïa kane ka jaka bad ha kaba ïa dei bad ki lad jingïarap, kane ka kynhun ka dang ïoh pdiang tang na ka tnad wildlife kaba khyndiat khynsoit hynrei kiba bun ki dang pynlut hi na ka met jong ki hi.
Namarkata, ha kane ka jaka kum ka kynhun ka dang don kam shibun ki lad jingïarap na ka sorkar khnang ba kin nanglah ban nangpyn-itynnad ïa kane ka jaka bad kaba donkam eh mynta ba na ka liang jong ka kynhun ka pynpaw long ha kaba ïa dei ka jingker kynroh khnang ba kin lait na ka thylliej jong ka dieng jong ka jingthangkhlaw namar kumba long mynta kane jingeh ka dei kaba hakhmat duh ba ha kylleng ki jaka ki mat bad ki ïa kynhun (jingthangkhlaw).

Leave A Reply

Your email address will not be published.