Nongstoiñ, Jymmang 20: Namar ka jingther jong u slap ha kane ka taïew ba la dep, ka jingtwa khyndew ha ki surok ha kylleng ki jaka ka jur bha haduh ba ka la don ka jingdkoh ha ha ka leit ka wan jong ki paitbah.
Kawei na ki surok kaba ka jingtwa khyndew ka jur bha ka dei ka surok na Langdongdai sha Malangkona. Ka jingtwa khyndew ha katei ka surok, ka la buh ïa ki paitbah nongshong shnong jong katei ka thaiñ ha ka jingeh kaba khraw ha ka leit ka wan.
U bah Birbor Riangtem secretary ka shnong Langdongdai haba pyntip ha u nongthoh khubor, u la ong ba ha ka jingshisha ka surok PMGSY na ka shnong Porïu haduh Langdongdai, la dep siang rong bad ki paitbah ki la kham suk shibun ban leit ban wan sha Malangkona.
Hynrei naduh ka shnong Porïu haduh Malangkona, ka la khohruh khohram bad lada ki paitbah ki mut ban leit donkam ha Riangdo ruh ki shem shitom. Namar ka surok tang shu poi ka aïom slap ki kali kim lah shuh ban ïaid, nalor ba ka don ka wah Rianggen kaba ha kine ki sngi ka um ka la heh bha.
Utei u nongïalam shnong u la ong ruh ba ha kine ki sngi naduh ba u slap u la jur bha, ki paitbah katei ka thaiñ ki la shem jingeh haduh katta katta ha ka leit ka wan. U la ong ba dang shen ki nongïalam ka Synjuk Nongsynshar Shnong Langdongdai Area ryngkat ki rangbah na katei ka thaiñ, ki la ïamih ban leit pynkhuid ïa ka jingtwa khyndew ha shilynter ka surok Langdongdai-Malangkona tang ban lait ki Mahindra pickup kiba ju leit kit ïa ki mar bam na ïew Joypur.
U la ong ruh ba wat la ki la pyrshang ban leit pynkhuid ïa ka jingtwa khyndew ruh tang da ka bor met kim lah ban pynkhuid lut. Kumta ha kine ki khyndiat sngi ban wan kin sa leit ban ïakynduh ïa u Executive Engineer ka tnad PWD, ban kyrpad ba un ïarap lem ha ka ban phah pynkhuid ïa ka jingtwa khyndew ha shilynter katei ka surok.
