Nongstoiñ, Jymmang 20: Ka jingther jong u slap ha ka taïew ba la dep bad kaba dang bteng man la ka miet haduh kine ki sngi, ka la pynlong ïa ki wah ba kin shlei bad ïa ki pyntha rep ba kin dap um.
Ha West Khasi Hills ki don ar tylli ki pyntha rep kiba jrong bad kiba ïar bha kiba long kum ka thiar na ka bynta ki hajar ki paitbah nongshong shnong kiba rep ba riang ha kitei ki pyntha. Kawei ka dei ka pyntha Umyiap kaba don shaphang mihngi na Nongstoiñ, kaba dei ruh kaba heh tam ha ka jylla bad kawei pat ka dei ka pyntha wahblei kaba don shaping mihngi na Riangdo. Kitei baroh ar tylli ki pyntha ki dei kiba don ïa ki wah kiba tuid na pdeng jong ki pyntha bad ki long ruh kiba sei soh bha.
Haba phai ha ka jinglong jingman jong kitei ki pyntha rep, ym ju kham jia koit ba kin shah tap um ha u bnai Jymmang. Hynrei dei tang ha une u snerm ba na ka daw jong ka jingjut palat u slap kitei ki pyntha rep ki la shah tap um. Haba phai ha ka pyntha Umyiap ka jingtap um ha kine sngi ba la dep, ka la palat ïa u lain u ba ka um ka ju poi ha baroh ki snem. Hynrei ka wah kaba tuid napdeng jong ka pyntha Umyiap ka kham sted bad ka kham rngad kloi. Katba ka um kaba tuid na pdeng ka pyntha wahblei pat ka kham suki.
Ka jingtap um ïa ka pyntha wahblei ka la neh naduh ka sngi thohdieng haduh ka sngi lah sngi u blei jong ka taïew ba la dep, ha kaba ki hali ki pynthor ki la sdang ban paw hynrei na ka jingther biang u sla man la ka miet, ka jing tap um ka dang neh haduh mynta.
Bun ki nongrep ki la ong ba lada ka jinghap slap kan dang bteng man la ka miet, kan long ka jingduh kaba khraw namar ha kine ki sngi ka ladei ka aïom ban puh ban lur shuwa ban thung, namar naduh ka taïew ba nyngkong jong u bnai ban wan kiba bun ki la sdang ban thung bad ban bet.
