Shillong, Risaw 21: U Dr. Mukul Sangma u nongïalam ka liang pyrshah bad u MLA ka Songsak bad dei ruh u MLA barim ka Ampati mynta ka sngi u la leit ban ïashim bynta ha ka jinglehniam Durga Puja kaba 73th ha Ampati bad u la ai khublei ïa ki paidbah ha kane aïom lehkmen.
Ha kane ka jinglehkmen ka la don ka jingpyni ïa ki shad tynrai kiba bun rukom, kaba kynthup ïa ka jingïalehkai drama, ki jingshad bad ki jingïakop kynti kane ka la wanrah ïa ka mynsiem ïaleh kmen leh sngewbha ha ki jingïakop ba bun rukom.
Kane ka jinglehniam ym dei tang ba ki don ki jingïalehkai bad ki jingpyni ïa ki shad tynrai hynrei ka plie ka lad ruh ïa ki kynhun nongrwai ba kin pyni ïa ki sap ki phong kaba ki don bad ïa ka jingdon ki riti dustur kiba la pynneh pynsah da ki briew.
