Ka synshar khaddar kaba biang bym noh shilliang, kwah u kyrtong TMC Nongstoiñ

>>Ngin pyndam ïa ka MoU ïa soi khappud: Kyrtong TMC Rambrai >>Ka sur na ki paidbah Nongstoiñ ki kwah kylla nongmihkhmat: Kyrtong UDP

0

Nongstoiñ, Rymphang 5: Ha ka sngi saitjaiñ ka 4 tarik Rymphang ki la don sa lai ngut ki kyrtong na ki ar tylli ki Constituency jong ka West Khasi Hills, kiba la pyndep ban thep kyrteng hakhmat u Returning Officer na ka bynta ban ïaleh ha kane ka Election ban wan ka ban long ha ka 27 tarik mynta u bnai.
Kitei ki lai ngut ki kyrtong kiba la pyndep ban thep kyrteng ha katei ka sngi ki long u bah Macmillan Kharbani u kyrtong jong ka All India Trinamool Congress na ka 32 Nongstoiñ Assembly constituency, u bah ar u dei u bah Fernandes Dkhar u kyrtong ka All India Trinamool Congress na ka 33 Rambrai Jyrngam Assembly constituency, u ba lai dei u bah Polestar Nongsiej u kyrtong ka United Democratic Party jong ka 32 Nongstoiñ Assembly.
U bah Macmillan Kharbani u la ong ba ka thong kaba hakhmat eh jong u lada u poi sha ka thong, ka long ban wanrah ïa ka jingsynshar kaba laitluid namar ha kine ki san snem ba la dep, ka jingsynshar kam dei shuh ka jingsynshar kaba da u paitbah ïa u paitbah na ka bynta u paitbah. Hynrei ka la dei ka jingsynshar donbor namar ka jingleh donbor ka la treikam ha baroh ki liang.
U la ong ruh ba ka jingrung jong u ha ka AITC ka dei namar ba u ïohi ba dei tang kane ka party kaba lah ban ïaleh pyrshah ïa ka jing synshsr donbor jong ka BJP. U la bynrap ruh ba ka AITC ka dei ka party ka bym tuklar ïa kano kano ka jingngeit ne ka jingmane Blei, hynrei ka shah laitluid ïa baroh ki pait nongshong shnong ka ri ba kin mane kat kum ka jingngeit jong ki. U la ong ba lada un poi sha ka thong, ka thong kaba u don ka long ban kyntiew ïa ki samla ha ki kam ki jam kat kum ka sap kaba ki don.
U bah Fernandes Dkhar kyrtong ka AITC na ka 33 Rambrai Jyrngam Constituency, u la ong ba lada un jop ha kane ka Election kaba mynta, ka thong kaba hakhmat eh jong u ka long ban pyndam noh ïa ka soskular pynbeit pud kaba ki ar ngut ki Myntri Rangbah ki la dep ïasoi. Namar ba katei ka soskular kam ïahap satia bad ka map kaba la dep phah naduh u 2011, namar ba lai pawa na ki jaka kiba hap ha katei ka map, ki la hap noh sha ka Assam kaba tang shipawa ki la hap ha Meghalaya.
U bah Polestar Nongsiej kyrtong ka UDP na ka 32 Nongstoiñ Assembly constituency, u la ong ba ha ki snem kiba u la sdang ban ïaid ha kylleng ki shnong, ki paitbah ki ud ki nam bad ki pynpaw shibun ki jingeh. Ki la kren da kaba shai ba ha kane ka kynti ki la kwah ban pynkylla noh ïa u nongmihkhmat jong ka Nongstoiñ, namar kat shaba ki phai tang ki jingeh suda la ka long ha ka kamai kajih, ka ïoh ka kot bad kiwei kiwei.
U la ong ruh ba lada ki paitbah kin ai ka jingkyrshan ban pynjop ïa u ha kane ka kynti, un peit kyrpang na ka bynta kiba duk kiba kyrduh, ban thaw ki lad ki lynti ban kyntiew ïa ka pule puthi, ka koit ka khiah, ki lad ai kam ai jam ïa ki samla khamtam eh ïa kiba la biang ka kyrdan. Ha kaba ïadei bad ka rukom thung kam pat u la ong ba ha kaba ïadei bad katei ka bynta ka shong katkum ka jinglah jong ki nongaplai.

Leave A Reply

Your email address will not be published.