Mawkyrwat, Rymphang 05: Ki ar ngut ki kyrtong ki ban sa ïa khun ha kane ka MLA Election jong u snem 2023 ha ka sngi saitjaiñ jong ka taïew ki la pyndep ïa ka jingthep ïa ki kyrteng jong ki ha ki Returning Officer, South West Khasi Hills District.
Ki ar ngut ki kyrtong kiba la pyndep ban thep kyrteng ki long u bah Medalsing Lyngdoh na ka Hills State People’s Democratic Party (HSPDP) u ban sa ïa khun na ka 36 – Mawkyrwat Constituency bad u bah Overlin Imïong na ka Voice of People’s Party (VPP) jong ka 35 – Ranikor Constituency.
U bah Medalsing Lyngdoh u kyrtong HSPDP na ka 36 – Mawkyrwat Constituency haba kren ha ki lad pathai khubor u la ong ba ha kane ka MLA Election 2023 na kane ka konstitwensi um don jingartatien bad kyrmen skhem ban jop bad kane ka jingkyrmen ka long namar ki la don katto katne ki kynhun ne ki nongkyrshan kiba wan ban ai jingkyrshan ïa ka HSPDP kum u bah Hadrian Lyngdoh uba dei u MDC barim na ka party PDF bad ruh ha ki por kiba la dep ki la don bad na ka UDP hynrei da ka jingwan u bah Renikton Lyngdoh Tongkhar sha ka UDP kiba bun ki la mih noh ban leit pynïasoh noh bad ka HSPDP jong ka Mawkyrwat Constituency.
Kum u kyrtong na ka HSPDP, u la ong ba lada u poi ha ka thong jong ka jingjop ha kane ka jingïaleh, ki kam ba hakhmat eh ki jong u ki long ban shakri ïa u paidbah jong ka dong ka thaiñ bad ruh ban pynbiang ïa shibun ki jingduna ha kaba ïa dei bad ka pule puthi, ka rep ka riang, ka ïoh ka kot, ka ïoh kam ïoh jam, ki lynti ki synkin ban pynurlong ïa ki jingkwah ki paidbah.
Katba u bah Overlin Imïong u kyrtong na ka VPP na ka Ranikor Constituency ka daw kaba pynlong ïa uba un mih madan ban ïa ai reng ha kane ka jingjied ïa ki nongmihkhmat hapoh jong ka Meghalaya Legislative Assambly namar ba u ïohi ba ka Ranikor Constituency ka dang sahdien tam.
Kumta nga jied ïa kane ka VPP kaba don ïa ki nongrim ïa ka lawei bad ïa ka pateng jong ka jaidbynriew bad ka thong kaba ha khmat ka long ban ngin leit ha ka sur jong ki paidbah ban pyntip ba party kan wanrah ïa ka jingkylla ha jylla bad hapoh jong ka konstitwensi baroh kawei.
