Tam ki pulit Nongstoiñ ar tylli ki metïap ha ki jaka ba suba shah pynïap

0

Nongstoiñ, Rymphang, 5: Ha ka sngi saitjaiñ, ki riew paidbah kiba ïaid lynti ki la lap ïa kawei ka metïap kaba la thiah lyngktar ha nala kaba don ha ka dong Mawrangtangweiñ, kaba don marjan ka Ophis u DTO harud jong ka surok Nongstoiñ-Wahkaji.
Mar ïa lap ki riew paidbah ki la pyntip ha ki pulit, ha kaba na ka liang ki pulit ki la leit bran bran bad lap ba ïa ka met bad ka khlieh jong une u briew, la tep da ka ktieh jong ka khyndew katba ki kjat pat ki la paw shabar. Ki Pulit ki la sei ïa ka met bad la lah ban ithuh ba ka dei ka met jong ka Bah Yespar Pariong ba 54 snem, u ba dei na ka shnong Nongstoiñ.
Hadien katto katne, ïa kane ka met la pyn ithuh da ki ba haïing kiba pyntip ba u Bah Yespar u la jah na ïing naduh ka 27 tarik Kyllalyngkot bad u dei ruh u ba kyrni ha ka jingdih kyiad. Ki Pulit ki la rah noh ïa ka met sha Civil Hospital, Nongstoiñ ban pyndep ïa ka post mortem bad ka jingtohkit mynta ka la ïaid shakhmat.
Ha kajuh ka sngi kaba dei ha ka por janmiet, ki pulit ka Nongstoiñ ki la ïoh tam ïa kawei ka metïap jong u briew ba la ithuh kum u Donbokstarklin Syiem Shangoi, kaba la thiah lyngktar ha surok NH-44-E ha Jaidohkroh. Ha ka jingtohkit la lap ba ka khlieh bad ki bynta jong ka dur ka dar, ka shynrong khlieh ki la mong bad pait.
Ha ka jingtohkit, la shem ba une u briew u la ïap na ka jingshah tied na khlieh da ki kynja dieng, ha kaba ïa u dieng la shem na kane hi ka jaka bad ruh ba une u dieng u khia kumba 15-20 kg.
Ki Pulit ki la kit noh ïa ka metïap sha Civil Hospital Nongstoiñ ban pyndep ïa ka post mortem bad ha ka jingtohkit, ki la ïoh ban kem ïa uwei u briew ba suba donkti, u ba la tip kyrteng u Franklin Lyngkhoi 19 snem na la shnong Mawkohlur.
Ïa une u nongpyniap briew la ïoh kem dei na shnong Nongspung, da ka jingïarap ki riew paidbah. Ki Pulit ki la register case halor kane ka jingjia bad ka jingtohkit mynta ka la ïaid shakhmat halor kine ki jingjia.

Leave A Reply

Your email address will not be published.