Nongstoiñ, Naiwieng 03: Ha kane ka lah sngi u Blei ka 2 tarik Naiwieng ka dei ka sngi ban sah jingkynmaw ha ka history jong ka thaiñ Langpih ha kaba ka Raidmynsaw upper primary school kaba dei ka shlem ai jinghikai kaba nyngkong eh ha katei ka thaiñ ka la kynjoh sanphew snem haduh mynta naduh ba la seng ïa ka ha u snem 1976. Kumta kum ka dak jong ka jingkmen na ka liang ki nongpynïaid jong katei ka skul ka Managing Committee ryngkat ki paidbah nongshong shnong ki la rakhe ïa katei ka Jubili ksiar jong ka jingdap sanphew snem jong ka ha ka jingiphuh iphieng bad ka jingkmen.
Ïa katei ka jingrakhe la pynlong ha phyllaw jong katei ka skul ha kaba la ïadonlang da ki nongseng ïa katei ka skul ki nonghikai ba rim bad kiba mynta ki nongïalam ka Hynñewtrep Youth Council sengkmie kiba la ïadon bynta bad noh synñiang ïa katei ka skul da kaba ïarap ïa ka tulop ki nonghikai, ki khynnah skul, ki kmie ki kpa ki paidbah nongshong shnong na ki shnong ba marjan.
Ha katei ka sngi u Bah Methodius Dkhar MLA ka Mawshynrut uba long ruh u Myntri sorkar uba bat ïa ka tnad Labour bad Civil Supplies u la long u kongsan bad R.G. Momin MLA ka Rambrai Jyrngam u la long u symbud kongsan.
Ha katei ka jingrakhe ïa ka Jubili ksiar jong ka skul u Bah Methodius u la pyllait ruh ïa ka souvenir kaba la thoh ïa ka jingsdang jong katei ka skul kaba kynthup ïa ki kyrteng jong ki nongseng ki nonghikai bad ki dkhot jong ka Managing Commite. Ha kajuh ka por u kongsan u la plie ruh ïa ka u mot sah jingkynmaw ïa ka jingdap sanphew snem jong ka Raidmynsaw upper primary school bad plie ruh ïa u mot sah jingkynmaw jong ka Raidmynsaw RMSA Secondary School building kaba la dep ban tei ha u snem ba la dep.
Hadien ka jingplie ïa u mot sah jingkynmaw ïa ka jingdap sanphew jong ka Upper primary skul bad ka RMSA skul la sdang ïa ka jingïalang ha kaba la pynsngew ïa ka history jong ka jingsdang jong katei ka skul da u babu Jospar Wanñiang uwei na ki nongprat lynti ha kaba seng ïa katei ka skul ha u snem 1976. Ha kajuh ka por la ïoh ïa ka jingkren na u Bah Roykupar Synrem president ka HYC sengkmie, u R.G. Momin Symbud kongsan.
La ïoh ka jingkren na u Bah K.P. Pangñiang MLA barim uba long ruh u nongaibuit jong ka Managing Committee jong katei ka skul bad khatduh eh la ïoh ïa ka jingkren na u Bah Methodius Dkhar uba long kum u kongsan.
U Bah Methodius haba ai jingkren u la pynpaw ïa ka jingsngewkmen ban ïohi ba katba nangmih ki sngi ka skul ha baroh ki liang ka la nangkiew. Nalor kata u la ong ruh ba na ka bynta ban kyntiew shuh shuh ïa ka jingnang jingstad ka jingïatreilang hapdeng ki nonghikai, ki kmie ki kpa bad ki khynnah skul ka long kaba donkam haduh katta katta. U la kyntu ruh ïa ki khynnah skul ba ki dei ban kohnguh ïa ki kmie ki kpa bad ïa ki nonghikai namar ki khynnah skul ki long ka pangsngiat jong ki kmie ki kpa bad ka ïng ka sem.
Nalor kata u la ong ruh ba ka lawei jong ka shnong ka thaw, ka jylla bad ka ri baroh kawei ka shong ha ki khynnah skul. Ha kajuh ka por u la ai mynsiem bad pynshlur ïa ki khynnah skul ba ki dei ban trei shitom bad minot ha ka jingpule jong ki namar mano ba lah ban tip ba ha kawei ka sngi na ka Raidmynsaw Upper primary bad secondary kan kiew kyrdan sha ka Highier Secondary haduh ka College ruh namar kumba ka long haduh mynta ka jingwan shakhmat jong ki khynnah skul ha ka Secondary School Leaving Certificate ka dei ka dak jong ka jingkyrmen na ka bynta ka lawei.
Khatduh eh na ka liang ka skul ka la pynkup burom ïa ki khynah skul kiba wan shakhmat ha ka SSLC Final Examination 2025-26 da kaba sam ïa ki momento.
