Shillong, Naiwieng 03: Ki 30 ngut ki nongshah hikai ki la ïoh pdiang ïa ki syrnod hadien ba ki la pyndep ïa ka jinghikai kaba 39 sngi halor ka Integrated Farming System (IFS), kaba pynleit jingmut ha ka jingri syiar bad jingri sniang. Ka jingïalang sam syrnod ka la long ha ka sngi Baar ha ka shnong Pyngkya, hapoh ka Mawkynrew Block.
Ïa kane ka jinghikai la pynlong da ka FMA Outreach for Underprivileged Women and Children, lyngba ka jingkyrshan pisa jong ka Meghalaya State Skill Development Society (MSSDS). Ka thong ka long ban pynkup ïa ki nongshong shnong nongkyndong da ki sap treikam kiba lah ban ïarap ïa ki ban seng kam lajong bad kyntiew ïa ka kamai kajih.
U MDC ka Mawkynrew, Bah Seibor Warbah uba long ruh u Executive Member ka EC ha KHADC, u la wan kum u kongsan ha ka jingïalang sam syrnod, katba u Rangbah Shnong ka Pyngkya, Bah Rikoles Kshiar, u la long u shah khot sngewbha kyrpang.
Kiwei kiba la ïadonlang ki kynthup ïa ka Sr. Garnet Sutnga, Director ka FMA Outreach for Underprivileged Women and Children; ka Sr. Janicia Nongrum, Assistant Director; bad u nonghikai, Bah Wolbest Lapang.
Ha kine ki 39 sngi, ki nongshah hikai ki la ïoh jinghikai ha ka liang ka jingtip bad ka jingpyntreikam halor ka jingri syiar bad jingri sniang. La pynleit jingmut ha ki rukom ri kiba kham bha, khnang ba kin lah ban pyndonkam ïa ki jingtip ba ki la ïoh na ka bynta ban kyntiew ïa la ka kamai jakpoh.
Kum shi bynta jong ka jinghikai, ki la leit ruh ban jngoh bad wad jingtip ha ka ICAR-KVK Ri-Bhoi, ha kaba ki la ïoh ïohi markhmat ïa ki rukom rep bad ri jingri katkum ka juk mynta, ryngkat ka rukom pynïasoh ïa kine ki kam.
Ki syrnod ba la sam ki long ka jingpynshisha ïa ka jingpyndep jong ki ïa ka jinghikai bad ka jingïashim bynta shitrhem jong ki ha baroh ka por jong ka prokram.
Ka FMA Outreach ka la pynpaw ka jingsngewnguh ïa ka MSSDS na ka bynta ka jingïarap pisa, bad ïa ki nongïalam shnong na ka bynta ka jingkyrshan bad jingïatreilang.
Ka seng ka la ban biang ïa ka jingkut jingmut ban bteng ban kyrshan ïa ki paidbah nongkyndong lyngba ka jinghikai pyntbit, ka jingkyntiew kamai kajih bad ka jingpynshlur ïa ka jingseng kam lajong.
