Nga don ka jingangnud ban pynurlong ïa ka Central Agricultural University ha Kyrdemkulai : Bah Jason Mawlong

Nongpoh, Rymphang 05 : Hadien ba la pyndep ban thep kyrteng kum u kyrtong ka National People’s Party (NPP) ban aireng na ka Umsning Constituency ha kane ka election 2023 hapoh ka jylla, u Bah Jason Mawlong kum u MLA ka Umsning bad uba la shim ruh ka rai ban aireng biang ha kane ka kynti u la pynpaw ba nalor shibun ki jingdonkam u paidbah ha ka Umsning Constituency ka Central Agricultural University ha Kyrdemkulai ka dei kawei na ka thong kaba un shim khia namar kumba long haduh mynta wat la ka jingthmu ban wan rah ïa ka University hynrei ka dang dei tang ka College of Agriculture bad ym ka Central Agricultural University.
Haba kren halor katei ka College of Agriculture ha Kyrdemkulai, lah ban ong ba naduh ba sdang ka jingthmu ka long ban wan rah da kata ka Central Agricultural University, ha kaba ka sorkar jylla ka la lah ban pynioh ïa ka jaka kaba heh bad kaba la biang pura ban pynlong kum kata ka Central Agricultural University, hynrei ha kaba khatduh la shu wan rah tang ka College of Agriculture kaba la shu bat shabi na ka Central Agricultural Universit, Imphal.
Kumba la pynpaw da u Bah Jason S. Mawlong haba kren sha ki lad pathai khubor mynta ka sngi hadien ba u la dep ban thep kyrtong kum u kyrtong ka NPP ban aireng na Umsning Constituency, “Nalor kiwei kiwei ki jingdonkam u paidbah ha katei ka Constituency ka mat kaba hakhmat eh kaba un kren lada ki paidbah ki dang pynjop biang kum u nongmihkhmat ka dei ruh ba pynurlong ïa ka jingdonkam ban kyntiew kyrdan ïa ka College of Agriculture sha ka Central Agricultural University kaba la don lypa ha Kyrdemkulai” u la ong.
U la ong ruh kum u MLA ka Umsning Constituency u la dep ruh ban ïa kren na ka por sha ka por bad u myntri rangbah ka jylla ba ka sorkar kan ïa kren sha ka sorkar kmie halor ka jingdonkam ban wan rah da ka Central Agricultural University bad ym ka College of Agricutlure, hynrei wat la kam pat urlong haduh kine ki sngi bad lada un wan biang ha ka bor ne ki paidbah ki pynjop biang ïa u kum u MLA ka Umsning un sa shim khia ban pynurlong haduh ban da ioh da kata ka kyrdan Central Agricultural University.
Shuh shuh, u la ong ruh ka daw kaba u angnud ban pynurlong kum kata ka Central Agricultural University, ka dei kaba u angnud ban kyntiew ïa ki kam rep ki kam riang hapoh ka jylla haba la don kata ka shlem ban ai jinghikai shaphang kata ka rep ka riang bad nalor kata ruh bun ki khun samla ka jylla kin ioh lad ban bsuh khlieh ban rung ha katei ka shlem pule na ka bynta ban pyntbit ïa lade ha ka kam rep ka kam riang ba ka kam rep ka kam riang ruh ka la dei kawei na ka lad kaba lah ban kyntiew ïa ka ioh kam ioh jam ki samla bad ruh ban kyntiew ïa ka ioh ka kot ki khun samla ba kin phai khmat ruh sha ka kam rep ka kam riang, u la bynrap.