Nongpoh, Rymphang 05: Ki nongïalam jong ka seng Hynñiewtrep Intigrated Territorial Organisation haka sngi Saitjaiñ kila hiar sha ka thaiñ Umsning ban pynïar ïa u tnum u tyndai jong ka jingshakri ka seng sha ki paidbah ka dong Ri-Bhoi bad ka jylla ban pynskhem ïaki nongkitkam ba thymmai jong ka HITO Umsning Area.
Ki nongkitkam ba thymmai jong ka HITO Umsning Area ki kynthup ïa u Samla Elvis Kyrsian President, Vice-President-Johny Kylla, Secretary-Banpynshai Umbah, Finance secretary Wanpynsuk Lyngdoh, Public secretary Jacky Dkhar, Sports Secretary Johnson Jana, Education Secretary Shanstar Lyngkhoi, Organizing Secretary Kresto Mawlang, Political Secretary Shining Star Sulein, Office Secretary Sunshine Shadap, lem bad 15 ngut ki dkhot.
Ïakitei ki nongïalam ba thymmai jong ka HITO Umsning Area la wan ban pynskhem bad pynbam smai da u Samla Kyrshan Kharnaior Organising Secretary ka sengkmie haka jingdonlang u Bah Apbor Nongrum Working President ka Ri-Bhoi District bad kiwei kiwei ki nongïalam bad ki dkhot ka seng.
Naka liang u Samla Kyrshan Kharnaior u la pynpaw ruh ka jingsngewkmen ba kitei ki khun samla kila mih shakhmat ban shim ïaka bynta ban peit ïaka jingeh bad khamtam ban wanrah ki jingkylla haka shnong ka thaw, kumba ki samla ki long ka lawei jong ka imlang ka sahlang bad ka jaitbynriew hi baroh kawei.
U la ai ruh ka jingkyrkhu kyrdoh ïakitei ki samla kiba la shim ïaka lyngkor ban kit bad bah ha katei ka thaiñ ba kin dang trei bha ïaka kam ryngkat ka jingïatreilang bad ki Dorbar Shnong ha kano kano ka por ban wanrah ïaka bha ka miat haki shnong ki thaw bad khamtam ka jingshakri sha ki paidbah namar kam myntoi ban ïeid ïaka jaitbynriew khlem da leh eiei bad ban nym ïeid ïaka jaitbynriew da ki kam pynduhnong ïaka ioh ka kot ka jylla naka bynta ka khwan myntoi shimet.
