Nongstoiñ, Nailur 25: Ki riew paidbah kiba don ha ka shnong Langja West Khasi Hills ki la shoh la dat bad thang ruh ïa ka kali jong uwei na ki riew rangbah jong katei ka shnong, u ba la tip kyrteng u Michael Sangma.
Kane ka jingjia ka la jia ha ka nohphai jong ka sngi palei 24 tarik Nailur, ha kaba la ong ba utei u rangbah u la rat ïa ka khyrdop ba la pynïeng da ka shnong kaba don ha katei ka surok, ka surok kaba rit ba la shna na ka skim 100 sngi, ong ki heh pulit ka District haba pyntip ïa kane ka jingjia sha ki lad pathai khubor.
Ki heh pulit ka District ki la ïathuh ba mar ïa ka ïohi ïa kane ka jingleh u bah Michael Sangma, mar mar ki longkmie ki la tur sha ka kali ba u shong. La ong ba hapdeng kata ka jingïakhluid, ki riew paidbah ki la sdang ban ïalum briew hynrei u Micheal Sangma u la pynkloi ban rung noh sha la ïing.
Ki pulit ki la pyntip ruh ba u Michael Sangma u la kam ba mar ïa poi sha ïing sah, ki longkmie bad ki kynthei ki la buddien bad sei ïa u shabar jong ka ïing, ha ka la don ruh ka jingïajrong kti. La ong ruh ba ki riew paidbah ki la ïoh ban pynmynsaw ïa u Sangma bad kiwei kiba donlang haïing. Ym tang katta la ong ba ha katei ka por, la don ruh kiba pynjulor ïa ka kali jong u bad khynñiat sha khap jong ka surok.
Halor kane ka jingjia ki pulit ka Langpih kiba don ha katei ka thaiñ, mar ïa ïoh jingtip ki la mareh ban tem ïa ka jingklumar bad ki la lah ban ïada noh ïa u Micheal Sangma, u ba la mynsaw bad la ïoh ban pynkit sha Nonglang PHC ban ïoh jingsumar.
Hadien kane pat la ong ba ka kynhun jong ki pulit ki la leit biang sha Langja bad ki la pyrshang ban tem ïa ka jingkhluit ki paidbah bad la lah ban pynpra noh ïa ki paidbah haduh ka por 11 baje mynmiet.
Hynrei, ha ka por 1 baje shiteng synñia katba ki pulit ki dang don ha lynti ban leit phai sha Langpih, ki la ïoh jingtip pynban ba ki katto katne ngut ki briew ki la thang ingkhong sa ïa ka kali jong u Michael Sangma kaba don ha khap surok.
Shuh shuh, ki heh pulit ki la pyntip ba na ka liang ki nongïalam shnong ki la mudui ruh da ka ejahar sha ki pulit ba u Micheal Sangma, u la shoh la dat ïa ki longkmie jong ka shnong, kiba la leit khnang haduh ha jaka sah jong u ban ïakren halor kaei kaba la jia ha khyrdop ha ka por janmiet.
Nangta ki la ujor ruh ba ki don sa ar ngut kiwei pat ki rangbah kiba pyrshang ban tem ïa ka jingjia, hynrei u Michael Sangma u la sei da ka wait ban pyntriem ïa ki ruh. Na ka liang ki heh pulit jong ka West Khasi Hills, ki la ïathuh ba mynta kin pynlong ïa ka jingtohkit halor kane ka jingjia ki arliang mamla.
