Ka sorkar MDA ka la pheil ha baroh ki liang, ong u bah Methodius Dkhar

Nongstoiñ, Nohprah 22: Kum ka jingpynkhreh ïa ka election ka ban long ha u snem ban wan, ka Hill State People Democratic Party Mawshynrut Constituency ka la pynkhreh shait shait, da kaba pynlong ïa ki jingïalang ha ki shnong ki thaw bad ban thung ïa ki shnat treikam naduh bapher bapher ha kylleng ki jaka jong ka Constituency.
Ha ka sngi balang ka 21 tarik Nohprah, u bah Methodius Dkhar kyrtong HSPDP jong ka Mawshynrut, u la khot ïa ki nongkitkam jong ki hynriew tylli ki zone ha ka jingïalang kaba la pynlong da ka shiliang wahblei zone ha ka shnong Seiñduli.
Ha katei ka sngi la pynlong ïa ka jingïalang ha madan phutbol jong ka shnong Seiñduli, ha kaba la pynïaid da u bah Kobarding Dkhar President ka shiliang wahblei zone ha kaba ki paitbah na ki shnong ba marjan ki la ïa tuid sha katei ka jingïalang ban sngap ïa ka jingkren jong utei u kyrtong.
U bah Methodius Dkhar haba kren ha katei ka sngi, u la ong ba ka sorkar MDA ba la ïalam da ka NPP ka la pheil ha baroh ki liang. U la ong ruh ba ki paitbah ha kine ki sngi ki la sngewthuh shai ïa ka jingpheil jong ka sorkar MDA, wat lada ka len katno katno ruh.
U la ong ba ka sorkar ka ju ong ba kam don pisa bad ka jingiakhih da kaba leit thiah surok bad ka jingshah thngan jong ki nonghikai, la ki dei ki nonghikai SSA, Adhoc, bad ki Government LP skul, ka pyni shai kdar ba ka sorkar ka la pheil da kaba ong ba kam don pisa. Katba ban pynlut da ki spah klur na ka bynta ban pynïeng kyrtong elekshon ha Manipur, Nagaland bad kiwei kiwei ki jylla ka don pisa. Nalor kata u la pynkynmaw ruh ba wat ki nongtrei ASHA ruh ki hap ban mih sha surok ban ïakhih namar ba ka sorkar kam ban siew tulop ïa ki.
U la kren bynñiaw bad pynkynmaw ruh ba ka NPP ha ka por ba u Conrad Kongal Sangma u wan ban pynlong jingïalang na ka bynta ban kanbas election ha madan Songsak ha Shahlang ha u 2018, u la thok im im peit peit ïa ki paitbah da kaba ong ba lada kin pynjop ïa ka NPP, hapoh hynriew bnai kan pyllait ban tih bad shalan dewïong kumba ju long, hynrei haduh mynta kam pat urlong.
Ki don pat ki briew kiba khaïi dewïong lynter, hynrei ym don ba pynwit namar ba ki Myntri sorkar ki don kti lang, katba ki nongkhaïi dewïong kiba rit baria ki la nang dap ram bad jynjar sat. U la pynkynmaw ruh ba kawei pat ka jingthok kaba ki paitbah ki la sngewthuh shai, ka dei halor ka jingkular jong u ïa ki nongïalam niam, ba un pynsangeh noh ïa ka jingïakhalai Casino. Katba ka jingtei ïa ki paki dulan na ka bynta ban pynlong ktem khalai Casino pat ka dang ïaid shait shait.
Ha kajuh ka por u la buh jingkylli sha baroh ki nongïalam jong ki kynhun balang Khrsitan, ba hato kum ki nongïalam niam ki sngew dei ne em ba ïa ka Meghalaya kaba la tip kum ka Christian State yn pynlong kum ka ktem ïa khalaiï. Hato ki nongsharai balang bad ki longkmie longkpa ki sngew tynnad ba ki khun jong ki kin kylla kyrni ha ki kam ïakhalaiï.
Lada ki nongïalam niam, ki nongharai balang bad ki longkmie longkpa kim kwah ban ïohi ba ki khun jong ki kin kylla long kiba kyrni ha ki kam ïakhalai, ki dei ban kylli na u nongmihkhmat jong ka Mawshynrut, namar u dei na ka NPP ba balei u sngap jar bad um kren ei ei ha Assembly halor katei ka Casino.
U bah Dkhar u la ong ruh ba um kwah ban da kynthoh than ïa u MLA ba mynta, hynrei ki paitbah kin bishar hi namar ki la jied bad phah ïa u, ba un shong ha Secretariat bad ba un leit sha Assembly na ka bynta ban shna ïa ki policy kiba kynsai kiba lah ban ai kam ai jam ïa ki samla kiba don ka sap, ki ban pynkhlaiñ ïa ki paitbah nongrep, ban wanrah ïa k jaka sumar kiba la bit la biang bad ka bai sumar ruh ka logn kaba jem, ban wanrah ïa ki jaka pule kiba biang bad kiba jem ka dor na ka bynta ki samla pule, hynrei utei u nongmihkhmat imat um shym leh ei ei halor kita baroh.
U la ong ba ki, paitbah ka Mawshynrut ki la dei ban pyrkhat sani bad lada ki kwah ban pynkylla, ka rai ka shong ha ki ym ha u kum u kyrtong. Namar ha ka synshar paitbah iwei I shympriah kti jong uwei pa uwei u nongshong shnong I kham khlaiñ bor ban ïa ki suloi ki tup ki man, kumta ka rai ban pynkylla ka shong ha uwei pa uwei.