La plie ïa ka jaka sumar ba 100 jingthiah ha CHC Mawkyrwat

Mawkyrwat, Nohprah 22: U bah Renikton Lyngdoh Tongkhar, Myntri ka tnad PHE bad kiwei uba long ruh u MLA ka Mawkyrwat Constituency mynta ka sngi u la plie ïa ka jaka sumar ba 100 jingthiah ha CHC Mawkyrwat, South West Khasi Hills District ha ka jingïadonlang u bah Pius Marweiñ, MLA/MDC jong ka Ranikor, u bah S. Kumar, IAS, Principal Secretary Health & Family Welfare, ka kong C. Kharkongor, IAS, Deputy Commissioner ka South West Khasi Hills District bad kiwei kiwei kiba shah khot sngewbha.
U bah Renikton Tongkhar haba kren kum u kongsan ha ka jingïalang, u la pynpaw ïa ka jingkmen kaba khraw ha kaba la ïoh ban plie noh ïa kane ka jaka sumar kaba ha ka jinglut baroh katkum ka revised estimate ka la kot sha ka 22 klur 41 lak bad kumba 101 tylli ki kam la lait ne ki sanction posts. U la ai ka burom ïa u nongmihkhmat barim u bah Rowell Lyngdoh (bam kwa ha dwai U Blei) uba la ïohi jngai ïa ka jingdonkam ban don kum kane ka jaka sumar na ka bynta ka jingmyntoi ki paidbah kane ka dong ka thaiñ. U khmih lynti ruh ba nangne shakhmat yn nang kham pynbha bad ban nangpynbit pynbiang ïa ki jingdonkam jong kane ka jaka sumar.
U bah Renik u la pynpaw ïa ka jingsngewkmen ha kaba la lah ban pynurlong ïa kane ka jingangnud bad ka jingphohsniew jong ki briew kane ka dong ka thaiñ bad u khmih lynti ba kane ka jaka sumar kan lah ban ai ki jingshakri kiba kham bha ïa ki briew kiba donkam jingïarap ha ka liang ka koit ka khiah. U la ïathuh ruh ba ka sorkar ka la dep pynkhreh lyngba ka tnad ka koit ka khiah, ka tnad Umbam Umdih bad kiwei kiwei ki tnad treikam na ka bynta ki jingshna pynbha ki ban pyntrei ha kane ka distrik ka la kot sha ka 700 (Hynñiewspah) klur ei ei bad u pynpaw ïa ka jingkmen ban ïohi ba kane ka dong ka thaiñ ka la sdang ban ïaid shaphrang ha ki liang baroh lyngba ki lad pynroi jong ki department bapher bapher.
Shuh shuh u la ïathuh ba la lah ban wanrah ïa ki kam ka jingkylla dur ha Ranikor ha ka liang ki surok bad kiwei kiwei ki kam pynroi. Ha kawei pat ka liang, u bah Renik, u la pynpaw ïa ka jingsngewdiaw halor ka jingkyrduh kam jong ki khun samla bad u la kyrpad ïa ka sorkar ban thaw ïa ki lad ki lynti ban weng ïa ki jingeh ban ban pynbha ïa ka rukom thungkam ha ka rukom kaba shai bad kaba khuid ba suba khnang ban ym pynduh jingkyrmen ïa ki samla wad kam.
Ha kajuh ka por u la ïaroh ïa kane ka department kaba la trei shitom ha kaba lah ban pynurlong ïa ka jingthmu ha kaba plie ïa kane ka jaka sumar da kaba thungkam shipor ïa ki samla tad haduh ba kin da lah ban pyndep ïa ki eksam thung kam na ka bynta ki kam ba lait.
Namarkata, u la khot bad wer ïa ka jingïatreilang jong ki paidbah khnang ban dang lah ban pynbit pynbiang ïa ki jingdonkam jong kane ka jaka sumar da kaba kyntu ïa ki nongpynïaid bad kiba trei ha kane ka jaka sumar ban trei hok bad ban ai ka jingshakri kaba khambha bad ban kren ki kyntien jali jaum kiba lah ban long ka jingtngen bad ka jingkyrmen ïa shibun ki mynsiem kiba kordor.
U bah Pius Marwein haba kren kum u symbud kongsan u la ong ba kane ka dei ka sngi sah kynmaw ha kane ka dong ka thaiñ bad namar ba ka jingkoit jingkhiah ka long kaba kordor ka jingplie ïa kane ka hospital kan ai jingmyntoi bad jingkyrkhu khamtam ïa kiba duk basuk ki bym kotbor ban leit sumar ha ki jaka sumar ba remdor. U la ïaroh ruh ïa ka sorkar MDA kaba la shim khia kyrpang na ka bynta ban pynbha ïa ka koit ka khiah bad ka roi ka par lyngba ki skhim bapher bapher khlem da klet noh ïa u nongïalam barim uba la prat lynti bad uba la treishitom na ka bynta ban pynurlong ïa kane ka jingphohsniew.
Ha ka jingkren jong u, u la kitbok kitrwiang bad ha kajuh ka por u la kyntu ïa ki nongtrei bad ki bor pynïaid jong ka jaka sumar ban ai ka jingshakri kaba biang bad ba paka na ka bynta kito kiba pang kiba shitom bad kiba donkam ka jingïarap.
U S. Kumar, I.A.S, Principal Secretary, Health & Family Welfare, ka kong C. Kharkongngor, I.A.S, Deputy Commissioner ka South West Khasi Hills District, Mawkyrwat, bad u bah P. Wanniang, Synjuk Rangbah Shnong, Mawkyrwat ki la ai jingkren ha kane ka sngi.
Katba ka Seng Samla Shnong Mawkyrwat (SSSM) ka la ai ïa ka Theme Song jong ka jingrakhe dap 50 snem jong ka jingïoh jylla bapura ka Meghalaya.
U bah L.T.Tariang,.M.C.S,.ADC.& P.D. DRDA,.SWKHD, Mawkyrwat u la pynïaid ïa ka jingïalang bad kham ha shwa u Dr. F.R. Lartang, District Medical & Health Officer, Mawkyrwat u la ai ïa ki kyntien pdiang sngewbha bad u Dr. W.L. Narry, District MCH Officer, SWKHD, Mawkyrwat u ai ki kyntien khublei.