Leit ai jingïarap ka TULBA Mawkyrwat Unit ïa ki lanot pluh ïing ha Shnong Phodjaud

Mawkyrwat, Nohprah 22: Kum ka dak jong ka jingsngewlem bad leh isynei ha kajuh ka por na ka liang ka kynhun ki nongñiah ar shaka ka ‘The Ultimate Legend Biker Association (TULBA) mynta ka sngi ki la leit ban ai jingïarap da ka song pisa bad ki jaiñkup ïa kawei ka longïing kaba la shah bam duh ha ka ding na shnong Photjaud South west Khasi Hills District.
Kumban shu kdew ba kane ka jingjia pluh jong ka ïing ka dei ha ka 21 tarik u Nohprah, 2022 bad ka dei ka ïing jong ka kong Merity Shylla bad u bah Honestboy syiemlieh ha ryngkat ki 4 ngut ki khun ha kaba kane ka longïing ka la duh ei ïa la ka jong ka ïing ka sem ha ka ding kaba klang.
Namakata, ha kane ka sngi hadien ba ka kynhun ka la ïoh jingtip halor kane ka jingjia kam shym la sngap hynrei ka la leit ban aiti ïa ka song pisa bad ki jaiñkup lyngba u Welding Shylla, General Secretary ka TULBA Mawkyrwat Unit bad la ïoh ruh ka jingkren ai mynsiem ïa kiba ha ïing ha sem jong kine ki lanot bad ha kajuh ka por la ïoh ruh ka jingduwai na u Wankit Nongkynrieh, Organising Secretary TULBA ka Mawkyrwat South West Khasi Hills District.
Ka TULBA Mawkyrwat Unit ka ai ruh ka jingkhublei ïa ki briew kiba la snohkti lem ban ai jingïarap ïa kane ka longïing ha kajuh ka por na ka liang kiba ha ïing ha sem ki la pynpaw ka jingsngewnguh ïa ka TULBA kaba la wan ban ai jingïarap bad wan ai mynsiem hapdeng ki jingsngewsih kthang ba ki la duh noh ïa ka ïing ba ki sah na ka jingshah bam duh noh ka ding.