Ka elekshon MLA ha la Jylla mynta ka la poi hajan eh bad kane kadei ka por ïa baroh ki kyrtong ba kin pyrshang lut ki lad ki lynti kumno ban ïoh khring ïa ki nongkyrshan na kawei ka party sha kawei pat bad kane hi kan ïai bteng tad haduh ka sngi elekshon. Kiban kham shah kthong bad shah pynbiej ha kum kine ki por kin dei ki Nongïalam ba hakhmat jong kino kino ki party khamtam ha kito ki party kiba kham biang.
Nangne shakhmat phin sa ïohi ba katei ka jingïarung ja mih ka jur bha bad lehse kane ka elekshon kan dei kawei na ki elekshon kaba khampher namar wat na ka liang u kyrtong um don jingshaniah shuh ïa la ki jong ki Nongïalam khamtam lada u ïohi lei lei ba ki leit bad kynduh bad kiwei ki nongïalam na kiwei pat ki party. Kane ka elekshon kan pynlyngoh lut ruh ïa baroh ki kyrtong kiba mih ban ïakhun namar wat u Nongkyndong ruh u la stad bha bad um pynpaw pyrthei shuh ïano u kyrshan bad ïano um kyrshan. Kane kam dei shuh ka juk ba ki nongleit jingïalang ki leit da ka jingieid bad ka jingshaniah ïa ki Nongïalam hynrei ka la dei da kawei pat ka jingmut.
Jan man ki jingïalang mynta la ju ïohi beit ba ka jingpoi ki paidbah ka dei beit da ki hajar ngut. Hynrei kaba pynlyngoh ka long da pynlong kiwei ki party ruh kiba poi jingïalang ka long hi kumjuh bad kane ka ja wat ha ki jingïalang ba pynlong da ki MLA. Kumta ban shu shaniah ha ka jingpoi jong ki paidbah sha ki jingïalang lehse baroh baroh kin kam ba ki la jop beit. Phewse baroh kitei ki long markhongpong lut namar ynda la ñiew lang ïa ka jingpoi jong ki paidbah ha ki jingïalang jong ki party bapher bapher kan poi pynban lai shah sawshah ïa ka jingdon ki nongthep vote.
Kane kadei ruh ka nongkyntu ïa ki nongshong shnong ba katlah katïai kiar ban rai ïa ka vote jongphi ha i Bai sha ne bai burom namar kane ka long thik ba phi ïapein ïa ka hok kaba phi ïoh shisien san snem bad ki ryngkat pliah. Donkam ban pyni sha ka pyrthei ba kum kata ka ri tipbriew tipblei ban ym ngop ha ka spah pyrthei ban thied nokot ïa ka shi vote. Lehse lada u kyrtong u biang bad u ai ruh bad i bai sha, ka shong ha phi ban rai, lehse phi lah ban kyrshan ïa u hynrei wat ailad pat ba ka pisa kan thied ïa ka dor bad ka hok jongphi.
Kadei ruh ka jingshisha ba ha ki khyndiat bnai shwa ka elekshon ki nongleit ai jingïarap kynthup ki nongsngewlem ki bun bha khamtam eh ha ki jaka ba don ki jingjia ba sngewsih ne ïapbriew. Dei ha kum kitei ki jingjia ba ki kyrtong ki ïohlad ban ïoh ïa kynduh briew lane pynithuh ba ki dei ki kyrtong ba thmu ban aireng. Teng teng i thamula ruh ba don ki khep ba lai ne sawngut ki kyrtong ki kynduh lang ha kawei ka jaka ba don kum kitei ki jingjia. Lehse na ka bynta kiba kham duna ka ïoh ka kot ka la long ka jingkyrkhu kaba khraw haba ki nongwan leh isynei bad ki nongnoh synniang ki bun.
Kane kadei ka juk kaba ki paidbah ki dei ban sngewthuh ba kano kano ka jingpynbiej shwa ka elekshon ka dei ka jingthied ïa ka hok jong ki bad kane ka long ruh kumba ki la shim ram shwa ka elekshon. Kumta ka jingbakla jong ki ban die ïa ka vote shwa ka elekshon ka long kumba ki la bynda ne ki la shimram na ka bynta ki san snem.
La sngewdei ruh ban kynthoh kylla ïa ki nongthep vote lada jia ba ki nongmihkhmat kim lah ban treikam bha lane kim lah ban ïasaid bha ha Iing Dorbar. Ka long ka jingsngewsarong ïa ka constituency lada jia ba ki nongmihkhmat ki lah ban treibah bad khamtam ban ïasaid ïa ki ishu jong ka thain lane jong ka jylla ha Jaidbynriew. Kane kan long ruh markhongpong lada jia ba ki nongmihkhmat jong kato ka constituency kim lah ban trei bha.
Ha kaba khatduh hi ka shong ha ki nongjied bad ki nongthep vote ban jied ïa ki nongmihkhmat jong ki, lada dei ba kim biej tang ha ki jingshah pynbiej shipor lehse ka thain jong ki kan ïoh shisha ïa ki nongmihkhmat kiba janai bad lada jia ba kim long kumta, ka constituency ruh kan mad katkum ka jingbit jong ki ban jied.
