Shillong, Nailar 16 : U Myntri Rangbah ka jylla u Conrad K Sangma u la ong ba ka sorkar jylla kan ïai bud dien bad ïai ban jur ïa ka sorkar pdeng ba ka dei ban shim khia bha halor ka jingwantuid ki mynder sha ka jylla da kaba pyntreikam ïa ka Inner Line Permit (ILP) lane ka Meghalaya Residents, Safety and Security ACt (MRSSA).
“ Ngi la ïai bud dien beit na ka sorkar pdeng bad ban jur ba ka dei ban thaw lad ban khang ïa ka jingwan tuid ki mynder ri sha ka jylla da kaba pyntreikam noh ïa ka MRSSA, ka ILP lane da kano kano ka aiñ ban tehlakam ïa kane ka jingwan tuid kyrthlep ki mynder sha kane ka jylla jong ngi” ong u Myntri Rangbah haba ïakren bad ki lad pathai khubor mynta ka Sngi Ba Ar.
Halor ka jingpynslem jongka sorkar pdeng ban pyntreikam ïa ka ILP wat hadien ba la dep mynjur da ka Resolution hapoh ka ïing Dorbar Thawaiñ ka jylla u la ong “ Halor kane ka jingïai bishar bniah bad ïai bishar bniah ka shong ha ka sorkar pdeng ban ai ka jubab namar nga hi ngam lah ban kren na ka bynta u myntri kam pohïing ka ri ne na ka bynta ka sorkar pdeng kumta ka jubab hi halor kane ka dei beit na ka sorkar pdeng”.
U la ong hooid ka kam jngohkai pyrthei kan shah ktah hi na ka ILP namar kin don ki jingshah teh kyndon hynrei kam long kaba dei pat ban ïakren ne pynïasnoh ïa kine ar bynta.
“ Nga kwah ban ban jur halor ka jingshisha ba ka kam jngohkai pyrthei ka dei kawei na ki lad bah ban kyntiew ïa ka ïoh ka kot bad ka ïoh kam ïoh jam ki khun samla ha ka jylla bad kan long ruh kawei na ki lad bah ban wanrah ka jingïoh lum khajna ba heh ïa ka jylla kumta na ka liang ka sorkar jylla kan ïaleh katba lah ban kyntiew ïa kane ka kam bad ngin ïai trei shitom ban pyntreikam ïa baroh ki lad ki lynti ba kane ka kam kan nang kiew na ka por sha ka por” ong u Myntri Rangbah.
U la ong ka ILP ka dei ka kam ba ïadei bad ki mynder ri kiba wan rung tuh sha ka jylla. “ Nga la ju kren na ka por sha ka por ba ki don bun ki lad ki lynti kat kum ki kyndon aiñ ban khang lad ïa ka jingwan tuid ki mynder sha ka jylla bad kawei na kita ki aiñ ka dei ka ILP kaba la pyntreikam ruh ha kiwei kiwei ki jylla ka ri. Dei ruh na kane ka daw ba ngi ruh ki la mynjur ïa ka Resolution ban pyntreikam hapoh ka jylla. Nalor ka ILP ngi don ruh ka MRSSA (Amendment) Bill kaba dang sahkut sha ka tnad kam pohïing jongka ri bad kumta ngi ïai bud dien bad ka sorkar pdeng ban ïoh ïa kine ki aiñ kiba khlaiñ ban tehlakam ïa ka jingwan rung beaiñ ki mynder sha kane ka jylla” pynkut u Myntri Rangbah.
