Shillong, Nailar 16 : Haba rakhe ïa ka lyngkhuh snem bad 77 ka jingïoh laitluid ka Ri India, u Myntri Rangbah ka Jylla Conrad K Sangma ha ka sngi Ba-ar ula khlei ïa 10 tylli ki jingkular sha u paidbah ka Jylla ban pruid dak ïa ki thong jong ka Sorkar ha kine ki san snem ban wan, ka ban aikam aijam ym tang ïa 5 lak ngut hynrei ban pynurlong ruh ïa la ka jingphohsniew ban pynlong ïa ka Meghalaya kaba biang nadong hadong.
Haba ñiew ïa ki snem 2023-2028 kum ka por ban wan ki jingkylla ha Meghalaya, u Conrad ula ong ba ka thong jong ka Sorkar ha ki kam pynroi ïa ka longbriew manbriew bad ka imang sahlang ha kine ki san snem wan wan lah ban kyllum lang ha ki 10 tylli ki jingkular.
Kine ki 10 jingkular ki long ki surok bab lah pynïasoh kiba bha, ka jingpynpoi kor umbam umdih sha man ki ïing, ka jingai bording ba khlem thut ha baroh kawei ka Jylla, ka jingpynïoh kor internet ha baroh ki Shnong, ka jingai ïing sha baroh kiba dei hok ban ïoh, ka jingpynbiang ïa ki jingdonkam baroh na ka bynta ki Khunlung naduh ba ki dang don ha kpoh ka kmie, ban wanrah ïa ka pule puthi kaba janai, ka koit ka khiah ïa baroh, ki madan ïalehkai ha baroh ki jingïalehkai bad ki jingtei ki ban donkam ban kyntiew ïa ka riti ka dustur bad ki samla.
“Ngi la ïatreikam mynta bad baroh ki kynhun bad ki paralok kynthup ka Sorkar India, ki Agency ba bei tyngka, ki Jaidbynriew jong ngi, ki Seng treimon sngewbha bad ki lad pathai khubor ban pynurlong ïa kine ki jingkular” ula ong haba kren ha ka jingrakhe ka ïa ka Sngi Laitluid ka ri ha Madan Polo hadien ba pynher ïa ka lama lai rong ka Ri.
Hynrei, ula kyntu ïa ki Nongshongshnong ba kin long kiba la pynkhreh ïa ki jingtynjuh jongka Pyrthei kum ka jingkylla ka mariang, ki jingpynthut jong ki kor technology bad kiwei kiwei. “Ngi dei ban pyrkhat bha bad leh eiei, hangne ha la Jylla bad ha pyrthei baroh kawei. Ka Sorkar jong nga kan ïai kut jingmut ban pynthikna ïa ka bha ka miat ka lawei jong baroh ki nongshong shnong. Ngin ïai pyrshang ban nang pynkhlaiñ ïa ka GDP ka Jylla bad ban aikam aijam ïa 5 lak ngut ki nongshong shnong” ula ong.
U Conrad ula ong ba ka Sorkar kan pynkhlaiñ bha ha ka jingpyntreikam ïa ki prokram ka Sorkar India bad kiwei kiwei ki project kiba bei pisa nabar ka Ri. “Ngin nang pynïar ïa ka jingtreikam jong ki prokram ka Jylla kum ka FOCUS, PRIME, YESS Meghalaya, MOTHER, PROGRESS bad ka Home Stay Scheme. Ki Prokram ba thymmai kum ka CM-Elevate kan nang plie lad shuh shuh ïa ki samla bad ki nongseng kam sengjam lajong” ula pyntip.
Ula kdew ba ha kine ki san snem ban wan, ka Sorkar MDA-II kan tei ïa ka Meghalaya ha kaba “Ki Cooperatives jong ki Nongrep kin lah ban khaïi ïa la ki mar rep sha kylleng ki ïew hapoh ka Ri bad shabar ri kumjuh, ka Meghalaya kaba shah ñiew kum ka jaka wan shangkai kaba biang duh hapoh ka Ri, ka Meghalaya kaba bun ki Shnong ki la don ïa ki skul, ki jaka sumar, ki surok, ka umbam umdih, ka bording, ka kor internet, ki ïing ki sem, ki madan ïalehkai, ka Meghalaya kaba baroh ki Khunlung khynnah ki ïoh ïa ka kabu ba biang tam ha ka jingim lyngba ki jingkyrshan naduh ba ki dang don ha kpoh haduh da kila khie samla, ka Meghalaya kaba dei ka Nongïalam hapoh ka Ri ha ka jingïaleh ban pyrrben ïa ki khlaw ki btap da kaba jingai jingsiew ïa ki kam ban pynneh bad ïada ïa ki khlaw, ka Meghalaya kaba ki kynthei ki ïoh ïa kajuh ka hok ban ïashim bynta ha ka ïoh ka kot, bad kiwei kiwei.
