Ym lah pynwit u slap ïa ka jingieit Prah ki paidbah Mawthadraishan

Markasa, Nailar 16 : Wat lada u slap u la pynthut shipor ïa ka jingïalang ka VPP ha Markasa mynta ka sngi, hynrei ym shym la lah pat ban pynwit ìa ka mynsiem ieit VPP ki paidbah, haba da ki spah ngut ki la wan ban sngap bad pynïasoh ha ka jingïalang kaba la long ha Markasa.
Ha kane ka jingïalang la ïoh ïa ka jingkren na u Bah Ardent Basaïawmoit, President jong ka Party uba la batai pynshai ïa ki nongrim jong ka Party bad balei ba ka Party ka ïaid kylleng kylleng ka Ri Khasi Jaiñtia ban pynsngewthuh ìa ki nongrim khnang ba ki paidbah kin pynthymmai noh ïa ka rukom jied Nongmihkhmat la ka long ki MDC, MLA ne MP ruh.
“Ka VPP ka ïohi ïa ka jingdonkam ban pynsngewthuh ïa ki paidbah halor ka jingshah iehbeiñ, ka jingshah ìalam bakla ki paidbah ha ka por ba jied ïa ki Nongmihkhmat bad dei namar kane ka daw ngi ìaid kylleng kylleng”, la ong u Bah Ardent.
U la ong ba dei tang ka jingsynshar kaba khuid kaba lah ban weng ïa ki jingeh kiba ki paidbah ki mad ha kine ki sngi ba mynta.
Kumta u wer ïa ki paidbah ba kin pynïasoh bad kyrshan ïa ka VPP khnang ba kan sha ka lawei kaba phyrnai.
U Dr. Ricky Syngkon, General Secretary jong ka Party bad Kyrtong MP jong ka Seng, u la ïathuh ba um ju don bynta bad ki kam saiñpyrthei mynno mynno ruh, hynrei dei tad hadien ba u sngewthuh bad khamtam u ïohi ïa ka lynti ba u Bah Ardent u ìaid bad haba u la sngewthuh ba ka saiñhima sima kadei kaba kyntang ba la buh ryntih da U Blei ba u mih shakhmat ban ïatreilang ban thaw ïa ka Seng VPP.
“Lada ngi phai sha U Blei da ka jingsngewthuh, khlem pep U Blei Un jubab ïa ka jingduwai jong ngi”, u la ong.
U Bah Brightstarwell Marbañiang, MLA Mawlai, u la ong ba ka Mawthadraishan ka la shah kynnoh ba kadei ka Constituency kaba bieit ha ka rukom jied Nongmihkhmat bad kaba bieit pisa, u la ong ba dei ban law noh na kane ka jingshah kynnoh kaba kyrshan bad pynïasoh noh bad ka VPP ban dei ìa ki Nongmihkhmat kiba lah ban ai ka jingshakri kaba paka ïa u paidbah.