Mynjur u Lat ïa ka Market Bill, ïoh bor ka KHADC ban tuklar ïa ka ot kilo bad ka dor mar rep

Shillong, Nailar 16 : Ka Khasi Hills Autonomous District Council (KHADC) mynta ka la ïohbor ban tehlakam ïa jingshah ot kilot bad ruh ia ka dor ka mur jong ki mar rep lane kiwei kiwei ki jait mar hapoh ki ïew ki hat kiba hap ha u pud u sam jong ka hadien ba u Lat u la mynjur bad soi ïa ka Market Bill ba kan long aiñ noh bad tip mynta kum ka KHADC (Establishment, Mangement and Control of Markets) (Second Amendment) Regulation, Act 2021.
Ki khubor ba ïajan bad ka KHADC ki ïathuh ruh ba da ka jingmynjur jong u Lat ïa katei ka Bill, mynta ka Council ka lah ruh wat ban tuklar wat ïa ka dor ka mur khnang ba ki nongrep kiba wan die ïa ki mar jong ki, kin ym shah khñiot dor.
La ïathuh ruh ba kan don ruh ka komiti ba kyrpang kaban tip kum ka ‘Agricultural Produce and Livestock Marketing Facilitation Sub-Committee kaban peit ïa ka jingpyntyllun ïa kane ka kam.Ym tang katta, la ïathuh ba katei ka sub-committee kan peit ruh ba ka dor ka mur kan ym dei ban long hapoh ïa ka dor kaba la buh da ka Council.
Nalorkata, la ïathuh ruh ba da ka jingpyntreikam ïa katei ka aiñ kan ym don shuh kata ka jingkot kilo kyllum ïa ki mar rep kumba la ju khnium da ki nongrep baroh shi katta haba ki leit ban die jingdie ha ïew nalor kiwei kiwei ki kyndon kiba bun.
Ha kajuh ka por la ïoh jingtip ruh ba ka tnad Disctrict Council Affairs jong ka sorkar jylla ka la pynphai noh ïa ki phra tylli ki Bill sha ka Council ba kynthup ïa ki 7 tylli ki Bill ba dei bad ki Elaka bad kawei pat kadei jong ka Clan Bill namar ki dang donkam ban pynbeit ïa ki katto katne ki bynta kiba ka tnad ka la kdew.
Ki tyllong khubor ki ïathuh ruh ba ka EC ba thymmai hapoh ka jingïalam jong u Ban Pynïaid Sing Syiem mardor mar ïa shimti ïa ka kam ki la buddien ïa ki bill kiba sahteng bad kumta na ka liang ka sorkar jylla ruh lyngba ka tnad DCA ka la thaw ïa ka Expert Committee kaban bishar bniah ïa ki bill kiba mynjur da ka Iing Dorbar jong ki District Council.
La ïathuh ruh ba naduh ba thaw ïa katei ka Expert Committee ka jingphah ïa ki Bill sha u Lat ka la kham stet mynta.
Haba ïadei bad kitei ki phra tylli ki Bill kiba ka Council ka sngew ba ki lah ban don jingduna hangne hangtai, shen kan sa shong pyrkhat noh bad pynbeit khnang ban ïoh phah biang ïa ki sha ka DCA.
Halor kane haba ïakren bad u CEM, Bah Pynïaid Syiem u la kubur ba u Lat u la ai ka jingmynjur ïa katei ka Market Bill bad ruh ba ka DCA ka la pynphai ïa kitei ki phra tylli ki Bill ban pynbeit.