Ka sorkar India kala shukor ïaki samla pule ban tei ïaka CAU ba pura ha ka jylla

0

Nongpoh, Kyllalyngkot 05: Ki nongïalam bad ki dkhot jong ka Khasi Student Union da ka jingsnohkti lang ruh ka RBYF mynta ka sngi kila hiar kyrkieh sha College of Agriculture, Kyrdemkulai ha Ri-Bhoi hadien ka jingioh jingtip jong ka jingwan hiar jurip jong u myntri ka tnad Agriculture and Farmers Welfare jong ka sorkar pdeng u Narendra Singh Tomar ïa katei ka tnad pule ha Kyrdem Kulai.
Naka liang ka seng KSU haka jingïalam u Samla Donald V Thabah General Secretary, Samla Biangbor Paliar Vice President ka KSU, Samla Ferdinald Kharkamni President ka North Khasi Hills District ryngkat bad ki spah ngut ki dkhot kila pyn ap ruh da ki placard ha khyrdop jong katei ka shnat pule ryngkat ka jingpyrta shla hakhmat u myntri, ba kum ki samla pule kim kwah ïaka College hynrei ka sorkar ka dei ban ai da ka Central Agriculture University ha katei ka jaka namar kumba long mynta la pynlong ïa katei ka jaka pule kum ka College of Agriculture kaba hap ruh hapoh ka jingpeit jong ka Central University, Imphal kaba ym ïahap satia katkum ka jingthmu bad ka jingkular jong ka sorkar ban tei ïaka University kaba la shim ruh ïaka jaka kaba heh kumba 240 acre.
Ha katei ka sngi naka liang ka KSU kala pyndam ruh ïaki jingthoh bad signboard ba thoh College of Agriculture ba kum ka seng kam kwah ïaka College hynrei dei beit ban ai da ka University.
Haba kren sha ki lad pathai khubor naka liang u Samla Donald V Thabah General Secretary ka seng u la ong ba ka daw bala pynlong ïaki nongïalam ka seng ban ïakhih ha katei ka jaka hakhmat u myntri ka dei namar ka jingshukor jong ka sorkar India ban tei ïaka CAU ba pura jong ka jylla Meghalaya ha katei ka jaka bad ka jingbym ioh ïa ka CAU ba pura ka jylla Meghalaya ka la pynduh lad shibun ïa ki samla pule Khasi bad ruh ïa ki nongrep. Mynta ki Agriculture College ki hap beit hapoh ka jingpynïaid ka CAU Imphal ha Manipur bad lah ban sakhi ba kiba ioh klas bad ioh kam ki dei beit na jylla Manipur kaba long ka jingduhnong kaba khraw ïaki samla pule ka jylla bad kumjuh ruh ki nongrep.
U la ong ruh ba ka daw tynrai jong katei ka jingïakhih ka dei namar ka jingwan ïuh kjat jong u myntri ha katei ka jaka pule namar ka sorkar mynshuwa naduh u snem 2010 ka jingthmu ka long beit ban wanrah ïaka University jong ka jylla ka bym don shuh ka jingïasoh bad ka jylla Manipur, hynrei phewse hapdeng ka jingkmen bad ka jingkmih lynti jong ki paidbah ban ioh noh ïaka University kala mih kynsan ka khubor ba ka sorkar kan nym seng shuh ïaka University pynban kala seng ïaka College of Agriculture hapoh ka jingpeit jingkhmih jing ka CAU Imphal ba kum ka seng kam lah satia ban pdiang bad ka dei ka jingshukor im im peit peit jong ka sorkar pdeng kaba ruh kum ka jingbym kheiñ snep ïangi bad dei halor katei ka nongrim naka liang ka seng kala pynlong ruh ki jingïakhih naka por shaka por bad pyrshang ruh ban kynduh ïaki myntri sorkar pdeng kiba dei peit ïaka tnad ka rep ka riang ban pynkloi ban seng ïaka CAU haka jaka jong ka CoA.
Shuh shuh u ong ruh ba lada kane ka jingïakhih kam seisoh ban ioh noh ïaka CAU ba pura jong ka jylla naka liang ka seng kala byrngem ba lada wan biang ki myntri lane ki ophisar ka tnad ka rep ka riang ka jingïakhih kan long kaba kham tyngeh shuh shuh, u la bynrap.

Leave A Reply

Your email address will not be published.