Jowai kyllalyngkot 5: Mynta ka sngi u District Election Officer ka West Jaintia Hills District u bah B.S. Sohliya, IAS ula khot ïa ka jingïalang jong ki nongïalam jong ki seng Saiñ Hima Sima kiba kynthup ïa ka BJP, AITMC, NPP bad kiwei na ka bynta ban aiti ïa ki Final Electoral Rolls sha ki.
Mynta ka sngi la ïoh ban sam ne aiti ïa kine ki Electoral Rolls sha ki nongïalam Party jong ka 1-Nartiang, 2-Jowai, 3-Raliang bad ka 4-Mowkaiaw, ha ka jingdonryngkat u Additional Deputy Commissioner u PK Boro, u ma M.A. Challam, kong DD Syngai, kong B. Blah bad bah W.K. Kharbuli EAC.
Haba kren sha ki nongïalam Party u bah B.S. Sohliya, District Election Officer ula khot ïa ka jingiatreilang jong ki khnang ban ïoh ïa ka elekshon kaba khuid ba suba bad ba lait na kino kino ki kynrum kynram.
La ïoh ruh ka jingbatai pynshai shaphang ka Model Code of Conduct lyngba u ma M.A Challam, Addl. DC.
Katkum kane ka Final Electoral Roll jong ki Constituency hapoh West Jaiñtia Hills District ki nongthep vote baroh ki don 2,00,602 ngut. Na kine 97,102 ngut ki dei ki shynrang bad 1,03,500 ngut ki dei ki kynthei.
Ka 1-Nartiang Constituency ka don 44,337 ngut ki nongthep vote na kine 21,821 ki dei ki shynrang bad 22,516 ki dei ki kynthei, na 2-Jowai Constituency ki don 40,208 ngut ba kynthup 18,954 ngut ki shynrang bad 21,254 ngut ki kynthei, na 3-Raliang Constituency ki don 38,804 ngut ba kynthup 18,490 ngut ki shynrang bad 20,314 ngut ki kynthei, na 4-Mowkaiaw ki don 38,563 ngut kynthup 19,007 ki shynrang bad 19,556 ngut ki kynthei bad na 7-Amlarem Constituency pat baroh ki don 38,690 na kine 18,830 ngut ki shynrang bad 19,860 ngut ki kynthei.
