Shillong, K,’lyngkot, 05: U MLA jong ka National Poeples Party (NPP) u SG Esmatur Mominin uba mihkhmat ïa ka Phulbari Constituency uba la resaiñ ha ka sngi Balang u la pynïasoh bad ka Trinamool Congress (TMC) ryngkat lang bad u MDC jong ka Raliang Constituency u Bah Robinus Syngkon.
Ïa kine ki arngut la pdiang sha ka TMC da u State President u Bah Charles Pyngrope ha ryngkat ka jingsakhi lang jong u nongïalam ka TMC u Dr. Mukul Sangma.
U Bah Charles Pyngrope haba kren ha ka jingïalang pdiang burom ïa kine ki arngut u la ong, “ngi don arngut ki nongïalam kiba kynsai jong ka jylla kiba ryngkat bad ki nongkyrsha ki la rai ban long ki dkhot bapura jong ka Meghalaya Trinamool Congress na ka bynta ban shakri ïa ka ri bad ïa ka jylla baroh kawei.”
“Ha ka kyrteng jong ka National Chairperson, u National General Secretary bad baroh ki nongtrei jong ka Meghalaya TMC, nga pdiang sngewbha ïa u MLA jong ka Phulbari Legislative Assembly Constituency u SG Estamur Mominin. Nga sngewkmen ba phin don ryngkat bad ka kynhun jong ngi. Nga pdiang sngewbha ruh ïa phi baroh arngut bad nga ai khublei ïa baroh ki nongkyrshan bad ïa ki nongthep vote kiba la shim ïa ka rai ban long ki dkhot jong ka ing ka sem ka TMC. Ngi don ka thong ban ai ka jingshakri ïa ki paidbah naduh ka mynsiem, da ka jingkhuid bad ka jingaiti lut,” ong u Dr. Sangma.
U Mominin shwa ban shah jied kum u MLA jong ka Phulbari Assembly Constituency, u la long teng u MDC na Shyamnagar da kaba jop na ka tiket jong ka NPP. U la long ruh u Chairman barim jong ka State Forest Department.
U Dr. Sangma u la ai khublei ruh ïa u MDC jong ka Raliang, West Jaiñtia Hills u Bah Robinus Syngkon uba la pynïasoh bad ka Meghalaya TMC. “U Bah Syngkon u la long u briew uba la ai jingshakri ïa ki paidbah ha kiba bun ki kyrdan.”
Nyngkong eh u la long u Ophisar Sorkar bad hadien kane u la shah jied kum u MLA ha u snemn 2013 na Mookaïaw Constituency.
Hadien ka jingshakri kum u District Transport Officer (DTO) la phra snem kynthih, u Bah Syngkon u la resaiñ noh na ka kam ha u snem 2013 bad u la pynpaw ïa ka mon ban rung noh sha ka jylli jong ka saiñpyrthei ban shakri kham bha ïa ki paidbah.
Ha ka elekshon 2013, u la jop kum u kyrtong Independent na Mowkaïaw Assembly Constituency.
