Ha kine ki snem ba la leit, ngi la sakhi ïa ka jingmih bun ki samla Khasi, Jaiñtia bad Garo kiba pawnam ha ki bynta bapher bapher kum ha ka jingshad, jingrwai, acting, YouTube, social media, jingïalehkai bad kiwei ki sap jingïalehkai paidbah.
Kane ka long ka bynta kaba bha namar ka pyni ba ki samla jong ngi ki don ka sap bad ka jinglah ban ïakhun bad kiwei. Hynrei, kawei ka jingkylli kaba kongsan ka long: balei ba duna palat ki samla trai jylla Meghalaya kiba poi sha ki kyrdan ba hakhlieh tam jong ka ri kum ka Indian Administrative Service (IAS), Indian Police Service (IPS) bad Indian Foreign Service (IFS) lyngba ka Civil Services Examination ba pynlong da ka Union Public Service Commission (UPSC)?
Ka jylla Meghalaya ka dang shanñiah shibun ha ki ophisar IAS, IPS bad IFS kiba wan na kiwei pat ki jylla ban pynïaid ïa ki tnad sorkar. Ki bun na kine ki ophisar ki la trei bha bad la noh synñiang shisha ha ka jylla, hynrei dei ban ai ka jingïaroh kaba dei ïa ki. Hynrei, ka long ruh ka jingshisha ba u briew uba la heh la san ha kane ka jylla un sngewthuh kham jan ïa ka jinglong jong ki paidbah, ka rukom im, ka kolshor, ka ktien, ki rukom synshar shnong bad ki jingngeit kiba kyrpang jong Meghalaya.
Lada bun ki trai jylla ki rung sha kine ki civil services, kan pynkhlaiñ ïa ka jingïatreilang hapdeng ka sorkar bad ki paidbah. Ki rai shnong, ki polisi bad ki projek kin lah ban pyntreikam kham suk bad kham seisoh namar ki nongïalam kin sngewthuh bha ïa ka jinglong jong ka jylla. Ka daw ba duna ki samla kiba poi sha ka UPSC ka lah ban dei na kiba bun ki bynta. Bun kim tip bha shaphang ka Civil Services Examination. Don kiba sheptieng ïa ka jingeh jong ka eksamin. Don kiba duna ka jingïarap pisa, duna ki coaching kiba paka, duna ki mentor bad duna ruh ki role model kiba lah ban ai mynsiem, Hynrei kine ki jingeh kim dei kiba ym lah ban jop lada don ka jingthmu kaba skhem bad ka jingiarap kaba biang.
Ka jylla Meghalaya ka dei ban don ka thong ba ha man la u snem kin don bun ngut ki samla kiba rung sha ka UPSC bad nang bun kiba jop. Kane kam dei ban long tang ka kam jong ka sorkar, hynrei ka dei ka jingkitkhlieh lang jong ki kmie ki kpa, ki skul, ki kolej, ki skulbah, ki seng samla, ki sengbhalang bad ki riew paidbah.
Ka jingkyrpad ïa ka sorkar Meghalaya ba kan thaw ïa ki lad jingïarap kiba pura kum ki UPSC coaching centre kiba don kyrdan, scholarship, stipend, hostel bad mentorship programme na ka bynta ki samla kiba don sap hynrei kiba duna ha ka ioh ka kot. Ka jingbei tyngka ha ka jingpynmih IAS, IPS bad IFS ka dei ka jingbei tyngka ha ka lawei jong ka jylla.
Ha kajuh ka por, ka jingkyntu ruh ia ki samla trai jylla, khamtam kito kiba wan na ki longiing kiba lah ban kyrshan ia ka jingpule jong ki, ba kin nud ban shim ia kane ka jingiakhun. Ka UPSC kam dei tang ka eksamin; ka dei ka lad ban shakri ïa ka ri bad ia la ka jylla ha ka kyrdan kaba kham shalor. Lada uwei u samla na Meghalaya u jop IAS, IPS ne IFS, ym tang ba un kyntiew ïalade. Un kyntiew ruh ïa ka burom jong ka iing ka sem, ka kur ka jait, ka shnong ka thaw, ka dong ka thaiñ bad ka jylla hi baroh kawei. Kine ki ophisar kin long ki nongthaw polisi, ki nongïalam bad ki nongrai kiba lah ban wanrah ïa ka jingkylla kaba bha ha ka jylla bad ha ka ri.
Ka por ka la dei ba ngi dei ban angnud ym tang ban pawnam, hynrei ban long ruh ki nongïalam kiba lah ban thaw ïa ka lawei jong ka jylla. To ngin pynlong ïa ka thong ba ha ki snem ban wan, ka Meghalaya kan ym long tang ka jylla kaba pynmih ki nongrwai, ki nongshad, ki actor/actress ne ki YouTuber kiba tbit, hynrei kan long ruh ka jylla kaba pynmih bun ki IAS, IPS, IFS bad kiwei ki civil servants kiba don ka jingstad, ka jingïaineh bad ka mynsiem shakri paidbah. Kumba ong u Dr. A.P.J. Abdul Kalam: “Ka jingphohsniew, ka dei ka bynta ba nyngkong jong ka jingjop.” To ai ba ki samla jong ngi kin nud ban phohsniew kham ïar bad kham jngai.
