Nongstoiñ, Nailar 26: Kawei ka kali jong u Pulit ka Assam ka la ingkhong khait ha ka jingpluh ding, ha kaba la suba jur ruh ba ka la shah thang ha ki briew kiba ym pat tip satia haduh mynta.
Kane ka jingjia ka la jia ha ka thaiñ Langpih, ka thaiñ ha khappud jong ka West Khasi Hills kaba dang don mynta hapdeng ka jingïakajia pud hapdeng ka Assam bad Meghalaya.
Katkum ka khubor na ki heh pulit jong ka District, ki la pynpaw ba la suba jur ba kane ka kali ka la shah thang hynne ka step phyrngap ha ki por kumba 4 baje eiei. Ki la ong ruh ba ïa kane ka jingjia la pyntip nyngkong sha ki Pulit ka Langpih BOP da u Rangbah Shnong ka Mawsikar.
Kane ka kali ba don u nombor AS-01 DH-7347 ka dei jong uwei u Pulit ka Assam u ba shakri ha Mawsikar, Assam Camp. Ki Pulit ki la kylli jingkylli ruh ïa u Rangbah Shnong, Secretary bad ki nongshong shnong halor kane ka jingjia. Tangba imat ym don ba tip ei ei kumno ka jia.
Ki pulit ki ïathuh ba kane ka kali ka dei kaba shu pynieng harud surok hajan ka shnong Mawsikar, ka shnong kaba jngai tang katto katne meter na ka Assam Police Camp.
Na ka liang ki Pulit ki la ong ba ïa ka daw tynrai bad ki jingjia ba lam sha kane ka jingpluh ym pat shym la lah satia ban pynthikna ïa mynta. Hynrei, ïa ka jingtohkit la pynlong ha kane ka jaka, ha kaba ym shym la lap satia ïa kino kino ki kynja tiar kiba lah ban ai ksai ïa ka daw jong ka jingpluh ne ban suba ba ka shah thang.
Ki Pulit ki pyntip ruh ba na ka liang ki Pulit ka Assam ruh ki la pynlong ïa ka jingtohkit halor kane ka jingpluh kali. Nalor nangta, ki pyntip ruh ba ka jinglong jingman ka la long kaba jai jai bad ka jingpeitngor ïa ka shongsuk shongsaiñ ka la ïaid shakhmat.
