Shillong, Nailar 26 : U Symbud Myntri Rangbah ba dei peit ïa ka PWD (Roads), u Bah Prestone Tynsong ha ka sngi Balang u la ong ba ka jingpyntrei ïa ka surok Rongjeng-Mangsang-Adokgre (RMA), kaba la bei pisa lyngba ka NLCPR ka la poi mynta sha ka 97persen.
Ïa kane, u Symbud Myntri Rangbah u jubab halor ka jingkylli ba wanrah da u MLA ka Rongjeng, u Jim M Sangma ha Iing Dorbar Thawain ka Jylla. U Bah Prestone u la ïathuh ruh ba katkum ka work order ïa kane ka projek la buh ban pyndep hapoh 24bnai hadien ba la dep ai ïa ka work order.
Haba jubab halor ka jingkylli jong u Nongïalam ka Liang Pyrshah, Dr. Mukul Sangma, halor ka daw ba la pynlyngkot ïa ka project, u Bah Prestone u la ong ba ka Ministry of DoNER ka la shim ïa kane ka rai.
Ha kaba sdang, ka DoNER ka la ai jingmynjur ïa ka project kaba kot 210 klur, hynrei ka jingmynjur ba ki ïoh ka long (final administrative approval) ka long tang 123.28 klur.
U la pynshai ruh ba ka jingpynlyngkot ka long ha ka jingjrong jong ka surok, ym ha ka jingheh jong ka surok. Ka surok kaba la thmu ka long 28 KM hynrei ka la shah pynlyngkot sha ka 22 KM.
Haba bynrap lang, u Myntri Rangbah ka Jylla, Conrad K Sangma ula ïathuh ba na ka 210 klur, ka 120 klur ka dei na ka NLCPR bad 80 klur pat ka dei na ka NEC.
“Hadien kata, ka Ministry of DoNER ka la ong ba ym lah ban bei pisa ïa kajuh ka projek lyngba ar tylli ki bynta. Kumta ka sorkar jylla ka la jied ban bteng ïa ka bynta kaba 120 klur, katba ïa ka 80 klur la phah ban pyntrei ha kiwei pat ki projek.
