Ka NPP wat hapdeng ki jingshah kynthoh hynrei ka trei beit ïa ka kam: Kitborlang Nongrem
Mawkyrwat, Rymphang 18: U State Secretary jong ka National Peoples’ Party (NPP) Bah Kitborlang Nongrem ha ka jingïalang paidbah ha ka shnong Mawthynrew-Rangthong, South West Khasi Hills District u la ong ba ka NPP wat hapdeng shibun ki jingshah kynthoh hynrei ka trei beit ïa ka kam na ka bynta ka roi ka par jong ki paidbah bad kam shym la heh tang ka tyngam ban ong ieid jaitbynriew tang da ka ktien hynrei da ki kam.
Haba kynthoh ïa ka jingkren jong u nongïalam ka Voice of the People Party (VPP) u Bah Nongrem u la jingkylli, “hato dei tang u Bah Ardent mo uba ieid ïa ka jaitbynriew? Em kam dei kumta, ka NPP ha ka jingïalam u Conrad K. Sangma naduh ba ka la ïoh ban thaw Sorkar naduh ka Sorkar MDA-I bad MDA-II ka la ïoh jingkyrkhu kaba khraw hapoh Ranikor Constituency ba ka la ïoh ïa ka Civil-Sub Division ha ka por u Martin M.M. Danggo.”
U Bah Nongrem u la ther tyngeh ïa u President rangbah ka VPP da kaba ong, “kine ki briew mynta ki lap miet tang ban wohdaw wohnia ïa ki katto katne ki lad pathai khubor kiba la paw ha ka jylla Meghalaya ba kine ki lad pathai khubor ki la ai ka jingshakri ïa ki paidbah kumjuh ruh kiba la aikam aijam ïa shibun ki samla lyngba kine ki lad phathai khubor hynrei u Bah Ardent u la kynthoh bad ktah mat-ïong ba ki dei kita ki khubor ki la shah siew da ka dor ne paid news, bad kiba ïalam bakla.”
U la ong ruh ba u ïohi shai ba hashwa ka elekshon MP bad ka elekshon MDC mynta ki don bun kita ki Youtuber ne ki News Channel kiba kamai spah da ka jingkynthoh briew kiba long kita ki sangot kiba ïarap ban pyrta ïa kata ka seng prah ne ka VPP kiba ki briew ki tip shai kdar ba kita ki briew ki ïoh ïa ka kata ka khusnam da ka tiket MDC na ka party VPP.
Haba phai pat sha ka Sorkar MDA-I bad MDA-II kaba ïalam da ka NPP u Bah Nongrem u la ong ruh ba kane ka sorkar ka la buh ruh ïa shibun ki aiñ kiba ïada ïa ka jaitbynriew, ïa ka khyndew ka syiap, ka longkur longjait, ki aiñ ban ïada ne ban pynkhlaiñ ïa ki Rangbah Shnong, Seng Samla bad kiwei hato kita kim dei ki kam na ka bynta ka jaidbynriew, hato don mo u bym ieid ïa lade, ïa ka shnong, bad ïa ka jaidbynriew? la pynkut u Bah Nongrem.