Ka Meghalaya ka wan ha trai duh ha ki liang baroh, paw tang ka bamsap: Bah M. Kharkrang

Shillong, Rymphang 18 : U kyrtong ka BJP na Shillong North constituency ba dei ruh u heh pulit barim ka sorkar jylla, Bah Mariahom Kharkrang haba kren ha ka common platform ba pynlong da ka Dorbar Shnong Wahingdoh u la ong ba ka Meghalaya mynta ka don ha trai duh ha ki liang baroh hynrei ka wan ba nyngkong pat ha ka kam bamsap.
“Tuh ki ba hajrong, ki tuh ki high level bad ka pop ka hap hanga bad haphi,” u la ong.
Nalorkata, u ong ruh ba ki don bun ki party ha ki manifesto jong ki ki la pynpaw ba kin pynmih haduh 3lak ki kam, 5 lak ki kam. “Nga don tang kawei ka jingkylli, san snem mynshwa 7000 tylli ki kam kiba lait ha ki tnad bapher phi khlem lah ban pyndap, kita ki dei ki kam ba la mang hynrei khlem pyndap. Naei kein yn pynmih ïa ki 5lak tylli ki kam,” u la bynrap shuh shuh.
Shuh shuh u ong ruh ba kitei ki post ki dang don hynrei la shu phah trei casual ha ka jingsiew kaba long 12000 ne 15000 tyngka. “Kane kadei ka jingshim kabu namar ïa ka kam kaba phi hap ban ïoh 40000 ne 50000 tyngka hynrei la shu siew pat ïa ki kum ki nongtrei casual kaba ki hap pat ban trei ïa ka kam kum ki nongtrei ba pura.”
Nalorkata u ong ruh ba u ïohi ba bun ki party ki shu buh biang da ki juh ki manifesto kiba rim. “Ha u 2018 ki kren ïa ka medical college mynta ruh ki dang kren ïa kajuh. Ha shwa ka elekshon ki mareh ban plie mawnongrim kylleng kumta nga kylli balei phim plie ïa kitei ki mawnongrim ha u 2018.”
Shuh shuh u ong ruh ba ha Assam mynta ki buh thong ban buh ïa ka medical college man ki distrik hynrei katba ha Meghalaya tang kawei ruh ym pat don. “Lada ym don ka NEIRIGHMS lei lehse ngin dei ka jylla kaba ym pat don medical college ha ka Ri.