Ka Meghalaya bad kiwei ki jylla ki la ïakren bad ka Sorkar Pdeng ba kiew dor ki marbam

Shillong, Nailar 07 : Ka jingkiewdor ki mar ki mata naduh ki mar bam mar dih, ka tyndong lyer shet jingshet ka long kawei na ki mat ba la ïakynduh jingeh ym tang ka jylla Meghalaya hynrei baroh ki jylla hapoh ka ri India. Halor kane ki jylla baroh kynthup ïa ka Meghalaya ki la dep pynpaw hakhmat ka sorkar pdeng ïa kane ka jigneh kaba ki paidbah ki ïa kynduh khnang ba ka sorkar pdeng kan thaw lad bad leh ei ei halor kane, ong u Symbud Myntri Rangbah bah Prestone Tynsong.
“Ngi la dep ïakren bad ka sorkar India bad kata ruh ym tang ka Meghalaya hynrei wat kiwei kiwei ki jylla ruh halor kane ka jingkiewdor ki mar bam mardih” ong u bah Prestone.
Ïa kane ka kam ym lah ban ïakren tang ha ka sorkar jylla hynrei hap ban shim khia ruh da ka sorkar pdeng namar ki don bun ki daw kiba ktah ïa kane ka jingkiewdor ym tang na ka GST.
“Ym lah ban shu kynnoh tang ïa ka sorkar jylla hynrei ka dei naduh ka sorkar pdeng namar ki don bun ki mat kiba ktah ïa kane ka jingkiewdor ki mar bam mar dih bad wat ka tynsong lyer shet jingshet ruh. Nga ngeit skhem hadien ba ngi la dep pynpaw na ka liang ka sorkar pdeng ka dang shong bishar kumno ban leh ban pynhiar dor biang ïa ki mar bam mardih” ong biang u Symbud Myntri Rangbah.
Nalor kata u symbud myntri rangbah u la ïathuh na ka liang ka sorkar jylla ka la bthah ïa baroh ki DC ba ki dei ban peitngor bha ban y m don kano kano ka jingshim kabu na ki nongkhaii ïa ki paidbah nongthied nongpet bad la bthah ruh ban pynkhlain ïa ki District Monitoring Committee ba kin leit peit ïa ki dor ki mur sha ki iew ki hat.