2 kynta yn ïakhih ki nongtrei ka MeeCL ban pyrshah ïa ka Electricity (Amendment) Bill 2022

Shillong, Nailar, 07: Kum ka jingpyrshah ïa ka Sorkar Pdeng kaba wanrah ha Parliament ïa ka Electricity (Amendment) Bill 2022 na ka bynta ban pynbeit thymmai ïa ka Electricity Act 2003, ka Coordination Committee of Registered MeECL Association and Unions ( CCORMAU) ha ka sngi U Blei ka la pynbna ban pynlong da ka jingsangeh treikam kaba 2 kynta ha baroh ki ophis treikam jong ka MeECL kiba don hapoh ka jylla baroh kawei lashai ka Lah Sngi U Blei.
Ka CCORMAU ka la ong, ‘ka jingwanrah ïa kane ka Bill hapoh ka Parliament kan ktah ïa ka tnat Sam Bording, ïa ki nongthang bording bad ïa ki nongtrei jong ka tnat Sam Bording bad ïa ki Engineers.”
“Ha u snem baladep, ka Sorkar Pdeng ka la kohnguh lyngba ka jingthoh ba la phah sha ka United Kisan Morcha ha ka 9 tarik, Nohprah, 2021 ba ïa ka Electricity (Amendment) Bill yn ym rah satia ha Parliament khlem da ïamir jingmut bad khlem da ïasyllok shwa bad ki kynhun bapher bapher, kynthup ruh ïa ki nongrep,” ong u kyrwoh ba la soi da u President ka CCORMAU u Bah PK Shulet bad u General Secretary u Bah B.K Nongkhlaw.
“Kam pat don satia ka jingïamir jingmut haduh mynta mynne. Mynta lada ka Sorkar Pdeng ka la shim ïa kawei ka rai ban wanrah bad ban mynjur ïa ka Electricity (Amendment) Bill 2022 ha Parliament ha ka 8 tarik, Nailar, 2022, ka long ka jingpynkheiñ ïa ka kular ba la aiti da ka jingthoh sha ka United Kisan Morcha,” ong u kyrwoh na ka CCORMAU.
Shuh shuh, ka CCORMAU ka la ong, wat hapdeng ki jingïai kyrpad na ka National Coordination Committee of Electricity Employees and Engineers (NCCOEEE) bad ka All India Power Engineers Federation, (AIPEF) ka Sorkar Pdeng kam shym la khot ïakren satia bad ki Engineers lane ïa ki nongtrei wat tang shisien ruh halor ka Electricity (Amendment) Bill 2022.
Ha kaba ïadei bad kane, ka Coordination Committee of Registered MeECL Association and Unions ( CCORMAU) ha ka jingïalang ba kyrkieh, kum ka jingbud ryntih ïa ka rai jong ka National Coordination Committee of Electricity Employees and Engineers (NCCOEEE) kaba la pdiang ha ka National Convention kaba la long ha Delhi ha ka 2 tarik, Nailar, ba ka jingïakhih pyrshah ïa ka Electricity (Amendment) Bill 2022 bad ïa ka jingthmu wanrah ka Sorkar Pdeng da ka polisi ban aiti sha ki kynhun shimet ïa ka tnat Sam Bording, ha ka Lah Sngi u Blei ka 8 tarik, Nailar, 2022 lada ka Sorkar Pdeng ka la wanrah ïa ka Electricity (Amendment) Bill 2022 ha Parliament, ha kajuh ka por baroh ki nongtrei bad ki Engineer jong ka MeECL kin mih lut na ki jaka treikam ban pynlong ïa ka jingïakhih ryngkat bad ka ri baroh kawei da kaba rah ïa ki plakad bad ki banar na ka bynta 2 kynta ha baroh ki District Headquarter.
“Ka jingïakhih kan long kaba jai jai khlem da pynthud ïa ka jingsam bording. Hadien kane, yn sa nang ïakren shuh shuh ïa ki lad ki lynti ban shim ha kaba ïadei bad ka rai jong ka NCCOEEE,” ong ka CCORMAU.