Shillong, Nailar 7 : Ki Seng Bhalang bad ki nongshong shnong jongka jylla kim pyrshah ban wanrah ïa ka lynti rel kit mar haduh Byrnihat lada ka sorkar pdeng ka kloi ban pyntreikam shwa ïa ka Inner Line Permit (ILP) ha ka jylla, ong u Symbud Myntri Rangbah bah Prestone Tynsong.
Haba ïakren bad ki lad pathai khubor ula ong “ Na kata ka daw ba ka sorkar MDA ka ïai bud dien na ka sorkar pdeng man la ka por ban pyntreikam noh ïa ka ILP ha ka jylla Meghalaya namar lada pyntreikam ïa kane ka aiñ ki seng bhalang ruh kim pyrshah ïaka projek lynti rel kit mar”.
U la ong “ Na ka por sha ka por ki seng bhalang ruh ki ju pynpaw ba ki kloi ban pdiang ïa ka lynti rel halor ka kyndon ban pyntreikam shwa ïa ka ILP ha Meghalaya hynrei lada ym pyntreikam ïa ka ILP ki ruh kin ïai pyrshah beit ïa kane ka projek lynti rel”.
U bah Pretone u la ong “ Na kata ka daw ka sorkar ruh ka shim khia bha ban ïai leit bud dien ïa kane ka mat ILP sha ka sorkar pdeng ba kan pyntreikam noh ha ka jylla Meghalaya khnang ba kiwei ki projek ruh kin ïoh ban treikam khlem kino kino ki jingpyrshah. Namar lada don ka aiñ ban ïada ïa ka jaidbynriew khlem pep kan ym don shuh ka jingsyier na ki trai shnong bad seng bhalang ruh”.
Kham mynshwa ki seng bhalang ki la dawa na ka sorkar MDA hapoh ka jingïalam ka NPP ban khylliap lynnong ne klet noh ïa kane ka projek lynti rel lada ym pyntreikam ïa ka ILP ha ka jylla. Na ka liang ki Seng Bhalang ki la pynpaw shai ruh ba katba ym pat pyntreikam ïa ka ILP ha ka jylla kin ïai bteng beit ban pyrshah ïa ka lynti rel ruh.
Lah ban pynkynmaw ba ka sorkar pdeng ka la tyrwa ar tylli ki lynti rel sha ka jylla kawei na Tetelia sha Byrnihat kaba 22 Km bad kawei na Byrnihat sha Shillong kaba 108 km. ïa ka Tetelia sha Byrnihat la sdang ban pyntrei ruh hynrei la hap ban pynsangeh noh namar ba ïeng pyrshah ki seng bhalang khamtam ka KSU, FKJGP, HNYF, RBYF, HYC bad kiwei kiwei.
