Shillong, Nailar, 07: Ki shipai BSF ha ka sngi U Blei ki la pyntip ba hapoh ki 24 kynta ba la leit noh ki la ïoh kurup haduh 85 tylli ki mai na khappud ka East Khasi Hills bad East Jaiñtia Hills Distirct ïa kiba la thmu ban shalan be-aiñ sha ka ri Bangladesh.
Ki shipai BSF kiba ap pahara ha Sonapur, East Jaiñtia Hills District kiba la ïoh ïa ka jingtip kaba bniah ki la pynlong ka jingap ktem bad ïoh bat ïa kawei ka trok hajan Umkiang kaba kit haduh 24 tylli ki muid ia kiba la thmu ban shalan sha Bangladesh. U nongniah jong ka trok bad u nongbud tang shu ïohi ïa ki shipai BSF ki la phet krad ïalade bad ieh shadien ïa ka trok bad ïa ki muid.
Ha khappud ka East Khasi Hills, ki shipai BSF ki la ïoh kurup 61 tylli ki masi kiba shu ïaid sakma ha syndah ka jingker sainar shiah jong ka khappud bad ka Bangladesh ïa kiba la thmu ban shalan sha Bangladesh.
Namar ka Ri India ka dang pynkhreh ban rakhe ïa ka jingïohluid jong ka Ri ha ka 15 tarik mynta u bnai, ki shipai BSF ki la kham pynjur ïa ka jingpahra ha khappud ban khanglad ïa ki kam sniew bad ki kam khaïi be-aiñ ha khappud ka ri India bad ka Bangladesh.
