Ka mariang ka la ailad ka NHAI ka dei ban shna noh ïa ka surok NH-6 kumba la kular : JNC

By Mawphor News Desk On Oct 17, 2023

Khliehriat, Risaw 16 : Ka Jaiñtia National Council, ka la buh ka jingdawa ba ka NHAI ka dei ban shna noh ïa ka surok national highway 6 kumba ka la dep ban kular, namar mynta ka aiom slap ka la kut bad ka mariang ka la ailad ban pyntrei îa ka surok, namar kumba la NHAI ruh ka la pynshai bad ong ba mynta ka la ioh ar tylli ki ba la shim contract ban shna ïa kane ka surok, kawei ka dei ka ka SL infra Ltd bad ka MR Ltd ki ban maramot ïa ka surok naduh Jowai shaduh Ratacherra.
Ka JNC hapoh ka jingïalam u Education Secretary, u bah Diamon Bareh bad u Vice President, u bah Shanborlang bamon mynta ka sngi ki la let ban ïakynduh ïa u Deputy Commissioner ka East Jaiñtia Hills District, u Abhilash Baranwal, IAS bad buh ruh da ka jingthoh ha kaba ïadei bad ka surok NH-6, ka seng ka la dawa bad ban jur ïa ka NHAI ba ka dei ban maramot noh kloi ïa ka surok bad kumjuh ruh ba ka NHAI ka dei ban synreit um ar sien shi sngi ïa ka surok khamtam ha Khliehriat namar ki paidbah ki la shah ktah haduh katta katta ha ka jingjur palat ka pum pum khyndew kaba na ka daw ka jingsniew ka surok bad ka jingsynreit um ka dei ban long ha ka por ba leit skul bad por ba wai skul ki khynnah namar ki jingpum pum khyndew ka la ktah ïa ki khynnah skul kiba iaid lynti na ki lynti iaid khat ha Khliehriat, ka jingjur palat ka pum pum ka la ktah ruh ïa ki iïng kiba don ha rud surok, kumjuh ruh kiba shong die dukan ha rud surok ha Khliehriat.
La ong ruh ba ha ka jingiakren bad ki nongïalam jong ka JNC, u Deputy Commissioner ruh u la kular ban shim khia ïa kane ka jingdawa jong ka seng bad u la kubur ruh ka ka jingpum pum khyndew ka la ktah shisha ïa ki paidbah bad ki khynnah skul kiba iaid lynti, u la kular ruh ban shim khia ban bthah ïa ki nongtrei ka NHAI ban synreit um ïa ka surok ban lait na ka jingpum pum khyndew.
Halor kane ka jingkular jong u DC ban shim khia ïa ka jingdawa, ka JNC ka la pynpaw ka jingsngew nguh ïa u Deputy Commissioner.
Kum ban shu phai dien, ka Jaiñtia National Council, dang myn ha ki khyndiat sngi ba la leit ka la ujor bad bud dien na u CGM HR Admn. Coord jong ka National Highway Authority of India, u Sunil Prakash Bhardwaj bad ka seng myn ha ka 11 tarik mynta u bnai ka la ioh pdiang ruh ïa ka kaiphot na utei u heh jong ka NHAI, ha kajuh ka por ka seng ka la ong ruh ba ‘Ka jingbym shim khia ka NHAI ban maramot ïa ka surok ka pynkylla sohpdung ïa ki paidbah’.
Katkum ka kaiphot ba la ioh pdiang da ka seng, la ong ba ka NHAI ka la ong ba na ka daw ka jingther jur palat u slap ha ki aiom slap ka la pynlong ïa ka surok ba kan jot, kan julor , la ong ruh ba ki nongtrei jong ka NHAI ki la dep ban maramot ïa ka surok naduh ki bynta jong ka surok na Sonapur shaduh Ratacherra kata ha shwa ban wan ka por slap, la ong ruh ba na ka daw ka jingther u slap ki nongtrei ki la sangeh noh shwa bad kin sa bteng biang ynda la poi ka por ba rang bad bym don slap.
Shuh shuh, ka NHAI ka la kam ba ïa ka jingmaramot ïa ka surok ki nongtrei ki ju leh man ka por, hynrei tang ha ki katto katne ki jaka ki khlem leh ïa ka jingmaramot bad ong ruh ba ka jingsniew bad jingjulor ka surok ka dei na kiba bun ki daw ba kynthup ka jingtuid ka um na ki jaka sait kali, ka jingpyniaid pathar ïa ki pipe um bad namar ka jingkit palat pud ki kali ba kit jingkit kiba kit ïa ki mar na ki par bad ka jingpyntuid um pathar na ki shnong ki thaw ki bym don ïa ki nala tuid um kiba biang.
Ka NHAI ka la kynnoh ruh ba na ka daw ka jingot ne pom pathar ïa ka khyndew, ka jing jingpyndap pathar ïa ka khyndew ha ki par maw jong ki briew shimet kata naduh Khliehriat shaduh Ratacherra ka la wanrah ïa ka jingjulor ka surok. la ong ruh ba ka ophis treikam jong ka NHAI lem bad ki contactor jong ka Highway Project ki pyrshang katba lah ban maramot pynbha ïa ka surok bad ruh ban shim khia bha ban maramot ïa ka surok bad kular ruh ban pynlong ïa ka surok NH-6 naduh Jowai shaduh Ratacherra ka surok kaba bha bad kaba shngaiñ ha ka leit ka wan.