Shillong, Risaw, 16: Ka Myntri ka Koit ka Khiah jong ka Sorkar Jylla ka Dr. Mazel Ampareen Lyngdoh ka la lap shibun ki jingduna ha jaka sumar kaba don ha Nongmynsong ha ka jingleit jngoh dalade ha ka Lah Sngi u Blei.
Ïa ka Myntri la synran lang da u MDC ka Malki-Laitumkhrah Constituency u Bah Fantin J. Lakadong, ka Director jong ka tnat ka Koit ka Khiah ka Dr. R Ally, ka ka DM&HO ka Dr. Shakina Lyngdoh bad ki nongkitkam jong ka Dorbar Shnong Nongmensong lem bad ki ASHA.
Kumba ka long, ha baroh ki dong jong ka nongbah Shillong ka don kawei ka jingeh na ka jingshah ktah ha u drok, ha kajuh ka rukom ha Nongmynsong ruh ki shnong ki ïakynduh ïa kane kajuh ka jingeh.
Ka jingai tika ïa ki khynnah ha ka shnong Nongmynsong ka long tang 57 percent bad kane ka jaka ai jingsumar kaba don ha Nongmynsong ka dei kaba la tip kum ka Wellness Centre kaba peit ruh ban ïada ïa ki jingpang kiba ïabit.
Ha ka jingïalang kaba lyngkot, ka Myntri ka Koit ka Khiah ka la ïamir jingmut kumno ban ïada na ka jingpang Tuberculosis (TB) ban lait ka jingïapur sha kaba kham heh da kaba ai jingpynshai sha ki paidbah ban pynsngewthuh ïa ki paidbah ba ka jingpang TB ka dei kaba lah ban sumar bad ban pynkoit tang lada ki nongpang ki dei kiba dih tista ïa ki dawai dashin.
