Ka kot shaphang u Kiang Nangbah hadien 160 snem ba la phasi ïa u

Jowai, Nohprah 28 : Ka 17 tarik u December ka sngi pyndonburom ïaka jingdap 50 snem ka Jaiñtia Students’ Union (JSU) ka dei ruh ka sngi kaba yn sah kynmaw haka histori namar ha kane ka sngi la pynpait paidbah ïa ka kot kaba thymmai shaphang u Kiang Nangbah. Kane ka kot kaba la ai kyrteng “U Kiang Nangbah: The Swordsman with the Stealth of the Tiger” ka dei kaba la thoh da u Dr. H.H. Mohrmen uba long uwei na ki nongthoh bapawkhmat jong ka jylla. U Mohrmen u dei ruh u nongthoh kolom, u riewtreimon sngewbha, u nongïada mariang bad u nongkren paidbah uba la thoh ruh ha kiba bun ki kot khubor bad ula pynmih ruh shibun ki kot, ula pynmih ïa kane ka kot hadien bun snem ka jingwad bniah jong u.
Kane ka kot shaphang u Kiang Nangbah ka khampher na kiwei pat ki kot bala pynmih shaphang jong u, namar ha kaba thoh ïa kane ka kot la shim na ki jingthoh jong ki shipai phareng bad ha kajuh ka por la shim ruh na ki parom kiba ki tymmen ki san ki ïathuhkhana naduh kata ka por haduh kine kip or mynta. Haba pule ïa kane ka kot la lap ba ki tyllong kiba u nongthoh u pyndonkam ha kaba thoh ïa kane ka kot ki dei lyngba ki shithi bad ki jingphah khubor ki shipai phareng.
Naduh basdang ka jingïaleh bad kumjuh ruh hapdeng jong ka jingïaleh, ki shipai kiba don ha kine ki lum ki ïapynphai jingtip shaphang ka thma lyngba ki shithi bad ki kwei pat ki lad phah khubor ha kata ka por. Dei lyngba kine ki shithi ba une u nongthoh hapdeng ki shipai ha kine ki lum bad ki heh shipai kiba don ha Calcutta bad Delhi ha kata ka por ba u nongthoh ula lah ban pynwandur ïa kane ka kot.
U nongthoh jong kane ka kot ula tih tynrai naduh ka tynrai une u khlawait, ka jaka kaba u sah bad haduh ka jaka kaba la phasi ïa u. Haba ïadei bad ka jingïaleh kaba la ïalam da u Kiang la lap ba kam dei kaba suk ïaka sorkar phareng ba kan pyndem ïa u Kiang. Lyngba ki lynnong jong kane ka kot la lap ba ka sorkar kala pyndonkam da ki syiem jong ki hima ba marjan bad kumjuh ruh wat da ki kur jong u Syiem Jaiñtia kiba wan kiew na thor ban pyrshang ban pynbor ïa u Kiang ba un pyndem ha ka sorkar nongwei. Dei hadien ba ka jingpyrshang ban pynbor ïa u ba un pyndem kam treikam ba ki shipai ki sa pynkhreh shipai pyrshah ïa u Kiang Nangbah.
Lyngba ki lynnong ha kane ka kot la ïathuh ba ka sorkar phareng ka phah pynkiew da ki hajar ngut ki shipai phareng sha kine ki lum ba ïaleh pyrshah ïa ki paid jong u Kiang Nangbah. Nalor ki shipai ka phah ruh ïa ki ryngkat bad ki suloi bad ki tup rit ruh kiba ki pynkiew sha ki lum Jaiñtia ban ïaleh pyrshah ïa ki nongïaleh laitluid hapoh ka jingïalam jong u Kiang. Namar kata ka jingïaleh kaba la ïalam da u Kiang Nangah kam dei kaba suk ïa ki phareng ba kin ïaleh pyrshah.
Ki don shibun ki jingtip kiba thymmai shaphang ka jingïaleh ki Pnar pyrshah ïa ki phareng kiba phin lah ban lap ha kane ka kot. Kane ka kot ka long dashisha ka thup jingtip shaphang ka jingïaleh jong ki Pnar pyrshah ïa ki shipai phareng kaba kut noh da ka shah shet kylla bad shah sdien phasi u nongïalam ki paidïaleh ki Pnar u Kiang Nangbah.
Ïa kane ka kot la thoh ha ka ktien Phareng bad ngeit skhem ba kan ïarap ym tang ïa ki briew jong ngi ba kin tip shaphang une u khun dap chynrang ki Pnar, hynrei ka pyrthei ruh kan tip shaphang jong u. Kane ka kot ka lah ruh ban rung kum kawei na ki kot pule ban hikai ïa ki samla pule ba kin tip khambha shaphang une u Khlawait ka Ri. Kane ka kot kala mih haka por kaba biang bha, ha u snem bala dap artad 160 snem hadien ba u Kiang ula khlad naka jingshah sdien phasi ha ki phareng. Kane ka kot ka don 150 sla bad ka dor jong ka ka long T.250/- ïa ka bailut ha kaba shon ïa kane ka kot u nongthoh u pynlut hi nalade.