Pyntip u SDO ba bthah ka ECI ban pynlong ïa ka SIR ha ki 16 tylli ki jylla bad 3 ki UT

Amlarem, Jylliew 08: Ka ophis jong ka Sub-Divisional Officer ka Amlarem Civil Sub-Division, Amlarem kala pyntip paidbah ba ka Election Commission ka India kala bthah ban pynlong ïa ka Special Intensive Revision (SIR) ha ki 16 tylli ki Jylla bad 3 tylli ki Union Territory (UT).
La pynbeit ïaka por jong ka SIR Phase-III da kaba buh ha ka jingmut ïaka jingrung ïing ki nongtrei ban leh ïaka House Listing jong ka Census kaba dang ïaid shakhmat mynta.
Da kane, ka SIR jong ka Electoral Roll kan kdup ïaka ri baroh kawei ha ka Phase – III lait noh ha Himachal Pradesh, Jammu & Kashmir bad Ladakh. Hadien ba la pyndep ïaka Phase – II jong ka Census ha kine ki lai tylli ki Jylla/UT bad ynda la peit naka jinglong ka suiñbneng ha ki thaiñ kiba kynjang/ba hap ïor, ïaka tarik ban pynlong ïaka SIR na ka bynta kine ki lai tylli ki Jylla/UT yn sa pynbna hadien.
Ha ka SIR Phase- III, palat 3.94 lak ki Booth Level Officers (BLO) kin rung man ki thliew ïing sha 36.73 klur ki nongthep vote ba la ïarap da ki 3.42 lak ki Booth Level Agents (BLA) ba la thung da ki seng saiñ hima ha ka por ba leh ïaka Enumeration.
Ka SIR ka dei ka kam kaba ïashim bynta lang da baroh kiba ïa don bynta kynthup ïa ki nongthep vote, ki seng saiñ hima ïa ki BLA ha man ki Polling Booth, ban pynthikna ïaka jingshim bynta jong baroh ki seng saiñ hima khnang baka SIR kaba la pynlong kan long kaba shai bad kaba khuid da ka jingïashimbynta jong ki seng saiñ hima.
Ha ki artylli ki Phase ba nyngkong jong ka SIR ha ki 13 tylli ki Jylla/UT kaba kdup jan 59 klur ngut ki nongthep vote kat haduh ka tarik jong ka jingpynlong ïaka SIR ha ka Jylla/UT, palat 6.3 lak ki BLO bad 9.2 lak ki BLA ba la thung da ki seng saiñ hima ki la ïadonbynta ha ki kyrdan bapher bapher jong ka jingpynlong ïaka SIR.
Ki tarik jong ka Special Intensive Revision naka bynta ka Jylla Meghalaya, na ka bynta ka tarik jong ki SIR kan long haka 01-10-2026, ka Jingpynkhreh, Jinghikai & Jingshon haka 20-06-2026 haduh 29-06-2026.Ka Jingrung thliew ïing jong ki BLO haka 30-06-2026 haduh 29-07-2026.Ka Jingpynbeit ryntih ïa ki Polling Stations Hapoh ka 29-07-2026. Ka Jingpynmih ïaka Electoral Roll ba nyngkong haka 05-08-2026.Ka Tarik ban phah ki jingdawa bad jingujor haka 05-08-2026 haduh 04-09-2026. Ka Notice Phase/jingpyndep ïa ki jingdawa bad jingujor haka 05-08-2026 haduh 03-10-2026 bad ka jingpynmih ïaka Electoral Roll ba pura haka 07-10-2026.