Jowai, Jylliew 09: Da ki spah ngut ki longkmie bad ki longkpa na kylleng ki shnong jong ka East Jaiñtia Hills District mynta ka sngi 9 tarik kila ïawan ban kyrshan ïa ka jingshah thngan jong u President ka JCOMSWA, ha Madan Ialehkai Bol ka Ladrymbai Dongwah bad hapoh ka jingïalam jong u Tymmen Basan G. Rapbait Bareh kum u Chairman, la pynlong ïa ka jingïalang paidbah, ha kaba la ïoh ïa ka jingkren na u President ka Association (JCOMSWA) ma Marshal S.B. Biam, Vice President (JCOMSWA) ma Pyndap Shadap, Information Secretary ma Overcome Dkhar, na ka kong R. Syntem kawei na ki longkmie na Mynso bad ka kong Jhanika Siangshai kaba long ruh ka Vice President ka DPT.
U President ka JCOMSWA, ma Marshal S.B. Biam hapdeng ka jingtlot ka met na ka jingshah thngan kaba 194 Kynta, u ong “Ka jingshah thngan jong nga kam dei na ka bynta ka jingmyntoi ïalade shimet, hynrei na ka bynta ka jingmyntoi jong phi ki phewhajar ngut ki Nongshong shnong jong ka East Jaiñtia Hills kiba la poi haka khim khait na ka daw ka jingkhang tih Dewïong jong ka Sorkar bad na ka bynta jong phi ki paidbah Nongshong shnong jong ka East Jaiñtia Hills District lada ym jubab ka Sorkar, ngan ïaibteng ka jingshah thngan bad ai ba ngan ïap na ka bynta jong phi ki hajar hajar ki longïing jong ka District kiba don ki par Dewïong ha ki jaka lajong bad kiba phim lah ban tih bad ban die Dewïong bad kane ka jingkhang tih Dewïong ka pynlong ïa phi kat shaba phai ha ka kutlad”.
U ma Pyndap Shadap, Vice President ka JCOMSWA haba kren ha kane ka sngi, u pynpaw ka jingkmen ka bakhraw ïa ka jingkyrshan jong ki paidbah ïa ka jingshah thngan u President ka Association ma Marshal S.B. Biam na ka bynta ki nongshong shnong jong ka District East Jaiñtia Hills bad ki trai Dewïong kiba la shah khangtih Dewïong da ka Sorkar kaba la kynjoh sha ki 12 snem mynta bad kane ka jingkhang tih Dewïong ka Sorkar ka pynlong ïa ki Nongshong shnong jong ka District ha ka jingkutlad ha baroh ki liang jong ka longbriew manbriew.
Ha ka juh ka por haba kane ka jingshah thngan u President ka Association (ma Marshal S.B. Biam) ka long na ka bynta ki paidbah, hynrei pat shano ki Nongmihkhmat Paidbah MLA bad MDC jong ka East Jaiñtia Hills District kiba wan jngoh bad kyrshan ïa ka jingdawa jong ka JCOMSWA bad ban pynsngew ïa kane sha ka Sorkar pynban ki jah laitnoh tang u ma Daeimi Liam, MDC jong ka Shiliang Myntang.
Ha ka juh ka por u ma Shadap u pynpaw ïa ka jingsngewnguh ïa ka jingwan jngoh ki dkhot ka JNC bad ka JSU Central Body ban ïa kyrshan lang ïa kane ka jingdawa jong ka Association, (JCOMSWA) bad ban kyrpad ïa ka Sorkar ba kan pyllait ne wengnoh shisyndon ïa kane ka jingkhang tih dewïong bad ban ailad ba ki Trai Pardewïong kiba don la u Dewïong ha ki jaka lajong jong ki ban kin ïohtih kumba ka long ha shwa ki 12 snem mynshwa.
