Ka jingpynpait shuki, pynpait tiar ka la pynjakhlia ïa ka dong ka thaiñ: Seng Samla Hima Langrin

Shillong, Nailar 07: Ka Seng Samla Hima Langrin (CEC) ka pynrem jur ïa ka jingwan shim kabu bad wan leh riew khlaw, ban wan pynjakhlia ïa ka dong ka thaiñ ka shnong ka Headquarter jong ka Hima mynta ka sngi ka 7 tarik Nailar 2026, hadien ba wai ka Dorbar Pyllun jong ka Hima.
Katkum ka kyrwoh ka ong ba ka Dorbar Hima ka dei ban ïatai ïathir da ka bor jabieng ym da kaba pynibor met mano ba khlaiñ. Ka Dorbar Hima kam dei ka lympung ïa tem ksing ïa put bisli. Ka dei ka lympung ban ïashut jabieng ym dei ka rynsan pynidoh ksah. Bad kaei ba jia ha ka sngi Thohdieng ka long ka bym itynnad ha kaba ha ka Dorbar ym don ba lait ang ne nang kren ne kylli jingkylli ynda lah wai ka Dorbar pat sa ïa pynpait shuki pynpait tiar.
“Ngi kyntu ïa u Syiem u khlieh ka Hima ban shim action bad pynshitom ïa kito ki nongpynklumar hadien ba wai ka Dorbar ban Suspend ïa ki katto katne snem ba kin ym lah shuh ban ïa shim bynta ne shong Dorbar tad haduh kin da pan map na ki khun ki hajar lyngba ka Executive Dorbar bad ruh ha ka Dorbar paitbah. Namar lyngba ka jingwan Dorbar kiba kum kine kan wanrah ïa ka jingdkoh ki wanrah ruh ïa ka jingbym shngaiñ ïa ki dkhot ba wan Dorbar kiba donhok ïa ka mynsiem jingkitkhlieh ban ïatai ïathir bad ïatei na bynta ka bha ka miat ka it ka Hima hi baroh kawei. Bad haba wan Dorbar bad kim hun ïa ka jingïatai ïathir ki dei ban ïaid shakhmat da ka lynti jong ka aiñ namar ka Ïingkashari ka don lada don ka jingbym hun ki dei ban tied jingkhang sha Kashari, khnang ba kin ïoh ïa ka hok jong ki lada ki sngewthuh ba ka hok jong ki ka shah khñiot hynrei ym da ka lynti ban wanrah ne thaw jingklumar ka Headquarter jong ka Hima Langrin kam dei shuh ba dang ïa phong da ki sla dieng sla siej, hynrei ki dei ki briew ba lah shai nang stad bad kiew ha ki liang baroh lait noh sa tang ka surok namar ka jingbym ler u nongmihkhmat ne u MLA u MDC namar kata wat wan pynjah burom ne pynlehraiñ ïa ka dong ka thaiñ ka shnong ka thaw,” ong ka kyrwoh khubor.
Ka la ong ba kane ka long ruh ka nuksa ba sniew haduh katta katta bad ka bym itynnad namar kata na ka liang ka Seng yn sa shim da kiwei ki sienjam ban ai jingsneng ïa kine kiba donkti ba wan pynjakhlia ïa ka dong ka thaiñ bad phah ruh ka kyrwoh sha u nong sponsored ba katba dang mlien ban pyndonkam da ki Gang ban ïoh kheit ïa u soh ba la ibang eh da lei lei yn nym poi sha ka thong bad kan dang ngam pynban ka iktiar bad yn dang duh jingshaniah shuh shuh na ki paitbah, bad to shim ïa kane kum ka jinghikai ba lada don tang ka pisa khlem ka jabieng yn ym lah ban thaw pyrthei bad poi shaei shaei.
“Niuma! Sha kito ki kada kit blei thaw shim ïa kane kum ka jingsneng ba wei phi lah sdang ban deng sha kuriaw wat sngew ba ka duriaw jong phi kam rngad shuh,” ong ka kyrwoh na u Bah Makmilan Nongphlang, Bah P.S. Lyngdoh, General Secretary (CEC) bad President (CEC) Seng Samla Hima Langrin.