Shillong, Nailar 7 : Ka Dorbar Hima ba la khot da u Syiem ka Hima Langrin u Pa’iem Nangtei Sing Syiemiong, ha ka Sngi Thohdieng, ka la kulmar thlim bad lam sha ka jingmynsaw bun ngut ki paidbah bad kumjuh ruh ki Pulit kiba wan pahara.
Kane ka Dorbar Hima ka dei kaba la pynlong haka shnong Phlangdiloin. Kane ka jingkulmar ka la mih hadien ka jingkynnoh ba u Syiem um shym la ailad ïa ki Khun ki Hajar ba kin kylli jingkylli halor ki kam synshar khadar hapoh ka Hima khamtam ka jingkynnoh kam nongkynti u Syiem ïa ka khyndew ka Hima.
Haba ïakren bad ki katto katne ki Khun ki hajar ka Hima, la ïathuh ba baroh kiba poi sha ka Dorbar kila bitar lep ïa ka jingkynnoh leh donbor u Syiem khlem da kheiñ snep ïa ki khun ki hajar kiba don shibun kiei kiei ban kylli bad tohkit ïa u Syiem halor ki kam jaka puta, ki khajna, ka synshar khadar bad kiwei kiwei.
La kynnoh ba u Syiem u khlem ailad satia ïano ïano ruh ban buh jingkylli ne kylli jingkylli bad thmu ban shu pynkut jubor ïa ka Dorbar khlem da ai ïa ki jingpynshai kiba thikna sha u Khun u Hajar.
Ki ïathuh ba dei kane ka daw ba ki paidbah ki la pynkulmar bad poi ïapynibor bad ki Pulit kiba wan ap pahara ïa ka Dorbar.
Ki ïathuh ba kumba ar ne 3 ngut ki riew paidbah kila mynsaw na ka jingshah siat tyndong lyer pynsat khmat ha ki Pulit kiba pyrshang ban pynpra ïa u paidbah na katei ka jaka.
Haba kylli, ki Pulit ruh ki la pynthikna ïa kane ka jingkulmar bad ïathuh ba ki don kumba 2-3 ngut ki riew paidbah bad kumjuh ruh ki Pulit kiba la mynsaw ha kane ka jingjia.
Ki Pulit ka South West Khasi Hills ki la pynkhlaiñ ïa ka bor pahara ha ka thaiñ ban pynthikna ïa ka jingtehlakam noh ïa kane ka jingkulmar.
U Syiem Nangtei Sing Syiemiong u ïathuh ba ïa kane ka Dorbar la khot pynlong na ka bynta ban pynshai ïa ki jingkynnoh pyrshah jong ki katto katne ki kynhun, kiba la leit tur paidbah sha KHADC dang shen.
U ïathuh ba ki jingkynnoh ki kynthup ïa ka jingpynïaid ïa ka Hima, ka jingkam nongkynti bad ka jingtreikam ka Management Board.
“Ka jingkhot ïa ka Dorbar ka long beit thik tang ban pynshai ïa ki jingkynnoh baroh” ula ong.
Haba ïakren bad u SP ka South West Khasi Hills u la ïathuh haduh 7 ngut ki Pulit ki la mynsaw bad uwei ula shitom jur na ka jingkulmar kaba mih hapoh ka Dorbar jong ka Hima Langrin ba long ha ka Sngi Thohdieng ha shnong Phlangdiloin, South West Khasi Hills.
U SP haba iathuh ba ki jingmynsaw ki la wan jia na ka jingshah lun maw ha ki paidbhur kiba la pynpra ïa ki shuki bad ki jingdon jingem ha kane ka jaka ba pynlong ïa ka Dorbar.
U pyntip ba kane ka jingkulmar ka la mih hashuwa ban kut artad ka Dorbar kaba la sdang ha ka por 11:30 baje mynstep.
U ïathuh ba ha kane ka Dorbar, ki don kumba 1500 ngut ki nongkyrshan u Syiem ki la wan ïashimbynta ha ka jingïalang hynrei katba dang ïaid ka jingïalang, ki la wan tur sa kumba 1500 ngut kiba pyrshah ïa u Syiem bad pyrshang ban pynthut ïa ka jingïalang.
Da ka jingdon ki Pulit bad Magistrate, la lah ban tem ia kine ki briew bad la ailad ïa ka jingïalang ba kan bteng. Hynrei shuwa ban kut ha ka por 12:15 baje eiei, katto katne ngut na kane ka kynhun pyrshah ki la pynkulmar da kaba kyrdem ïa ki shuki bad kiwei ki jingdon jingem ha katei ka jaka.
U ïathuh ba haba ki Pulit bad ki Magistrate ki la pyrshang ban tehlakam ïa kane bad khanglad ruh ïa ka jingpyrshang ban kiew shajrong rynsan, kine ki briew ki la sdang sa ka lun maw pyrshah ïa ki Pulit.
Khnang ban lah pynpra ïa u paidbah, ki Pulit ki la hap ban pyndonkam ïa ka bor bad hadien ki la lah ban pynpra ïa u paidbah na kane ka jaka.
Une u Heh Pulit u pyntip ba ïa mynta, ka jinglong jingman ka la jai jai biang ha katei ka jaka bad la pynbun ruh ïa ki bor pahara khnang ban khanglad ïa kino kino ki jingjia.
U pyntip ba ki Pulit ki dang ap ïa ka ejahar na ka Ophis u Syiem ka Hima Langrin ban leh ei ei kat kum ka aiñ halor kane ka jingjia.
