Shillong, Naiwieng 19: U Cultural Secretary ka Seng Khasi Seng Kmie u Bah Hammarsing Kharhmar u la ong ba ka jingbat ïa ka riti dustur jong ka jaidbynriew kan pynlong ïa u briew ban im ka mynsiem tip briew tip Blei bad kan wanrah ruh ïa ka jingtip ïa lade shimet kaban wallam pat ïa ka jingsuk mynsiem jong u briew.
Haba kren bad ki lad pathai khubor ha ka sngi Saitjaiñ kaba deei ruh ka ka sngi ba sdang ia ka prokram ba ar sngi ka Na Thymmei Festival 2022 kaba la pynlong ha Madan Weiking Jaïaw u la ong ba ka jingtip u briew bad ka jingsuk mynsiem kan wan ha u briew uba bat ïa ka riti dustur tynrai lajong namar ka jingpyrthuh bud ïa ka rong ïapan u briew un sngew long dukha mynsiem namar ym don tynrai kaba un seng nongrim ïa lade.
Haba jubab halor ka jingkylli ïa ki jingeh jingtynjuh kiba ka seng Khasi kum ka kynhun kaba ïalam lynti ban bat ban ksoh ïa ka riti dustur bad ka niam ka rukom ba la buh la seng da u ‘ñi u Kong, u Bah Hammarsing u la ïathuh ka jingwan ka juk stad mynta lyngba ki Social Media bad ka jingbeh ïa ka jong kiwei ha ka juk Globalization ka dei ka jingtynjuh hynrei watla katta u la ong ba ka Seng Khasi ka ïalam ïa kane ka lynti ban pynsngewthuh ïa jaidbynriew ba kan wanrah ïa kiei kiei kiba bha na bynta ka jaidbynriew la tip bad bat ïa la ka tynrai.
Haba kren halor ka jingthmu ka Seng Khasi ïa ka jingpyllong ïa ka Tamasa Na Thymmei u la ong ba ka jingthmu ka seng ka long ban pyni sha ka pyrthei ïa ka jingriewspah ka jaidbynriew Khasi ïa ka maïan tip Blei bad ka niam ka rukom.
U la ong ruh ka jingpyni ïa ka Phlim ne Sound and Light Show shaphang ka khanatang U Lum Sohpetbneng ka pyni ïa ka jinglong riewspah ka jaidbynriew bad ka jingpyrkhat ba jylliew bad ka rukom im u Khasi.
“Ka Khanatang u Sohpetbneng ka long ka spah jong ka jaidbynriew bad jong ka pyrthei hi bad da kane ka phlim ngi lah ban pyni ha ki dur bad jingbatai ïa kane,” u laong.
Shuh shuh u la ïathuh ba ha kane ka tamasa yn sa wan shim bynta da ki tnat seng na kylleng ka ri ban pyni ïa ka rukom kyrpang kaba kita ki shnong ne ki thaiñ ki bud naduh kulong kumah.
Ha kane ka sngi kaba nyngkong jong ka tamasa la ïoh ka jingshad na ki tnat seng ba pher bapher, ka jingpyni ïa ka phlim shaphang u Lum Sohpetbneng, ka jingïakop Nai Khadsaw Synïa bad ka Lukhimai bad kiwei kiwei de ki prokram.
