Ka jingpynduna dor ïa ka bai sumar nongpang ka thong ba kongsan jong ka Sorkar: PM

0

New Delhi, Lber 08 : U Myntri Rangbah Duh ka ri, u Narendra Modi, u la ai jingkren ha ka Post Budget Webinar halor ka phang‘Health and Medical Research’. Kane ka dei kaba khyndai ha ka thup ki 12 tylli ki webinar ba la pynlong da ka Sorkar ban twad jingmut na ka bynta ka jingpyntreikam ïa ki jingpynbna hapoh ka mang tyngka 2023 jong ka Sorkar Pdeng.
Ha ka jingai jingkren jong u, u Myntri Rangbah Duh u la ong dei ban peit ïa ki kam ai jingsumar kat kum ki rukom treikam shuwa bad hadien ka khlam Covid. U la ong ba kane ka khlam ka la buh jingeh wat ïa ki ri kiba riewspah tam ruh.
U la ong ba ka khlam ka la wanrah ïa ka jingphaikhmat baroh kawei ka pyrthei sha ki kam ka koit ka khiah katba ka India ka la ïaidshakhmat da kaba peit bniah ïa ka bha ka miat ki paidbah.
“Kadei namar kane ba ngi la wanrah ïa ka jingpyrkhat sha ka pyrthei – Kawei ka Pyrthei kawei ka Koit ka Khiah.Kane ka kynthup ka koit khiah kaba pura jong baroh ki jingim – ki briew, ki mrad bad ki jingthung jingtep.
U Myntri Rangbah Duh u la ban biang halor ki jingshem kiba la wan ha kaba ïadei bad ka jingpynbiang mar ha ka por jong ka khlam bad u la ong ba kane ka la long ka kam kaba pynkhuslai.
U la ong ba u sngewsih ba ki mar kiba pyllait im ïa ki briew kum ki dawai, ki dawai tika bad ki mar sumar ki dei kiba la pynkylla sha ki atiar haba ka khlam ka dang khlaiñ bha.
U Myntri Rangbah Duh u la ban jur ba ha ki mang tyngka jong ki snem ba la dep, ka Sorkar ka la pyrshang ban pynduna ïa ka jingshaniah ka India ha kiwei kiwei ki ri bad u la ban jur ruh halor ka bynta jong kito kiba don kti ha kine ki kam.
U Myntri Rangbah Duh u la kdew sha ka jingbym don ka jingpyrkhat jngai na ka bynta ka koit ka khiah da ki phew snem hadien ka jingioh jinglaitluid. U Myntri Rangbah Duh u la ong ba mynta ka Sorkar baroh kawei ka trei na ka bynta kane ha ka jaka ban ieh ïa ki kam ka koit ka khiah tang ha ki kti jong ka tnat ka koit ka khiah.
“Ka jingpynduna dor ïa ka bai sumar nongpang ka la dei kawei na ki kam ba kongsan jong ka Sorkar jong ngi,” la ong u Myntri Rangbah Duh da kaba pyntip ruh ba lyngba ka Ayushman Bharat, la tyngkai kumba 80 hajar klur ka pisa jong ki nongpang ba duk ba suk namar ka jingïohei ïa ka jingsumar hapoh kane ka skhim.
Da kaba kdew ba lashai, ka 7 tarik u Lber ka dei ka sngi ba ju rakhe kum ka Jan Aushadhi Diwas, u Myntri Rangbah Duh u la ong ba ka jingïoh ïa ki dawai ha ka dor kaba tad lyngba 9000 tylli ki Jan Aushadhi Kendra ka la pyntyngkai kumba 20 hajar klur tyngka jong ki ba duk ba suk bad kito kiba dang duna jingioh ha kylleng ka pyrthei. Kane ka mut ba kine ar tylli ki skhim ki la pyntyngkai shi lak klur tyngka jong ki briew jong ka ri.
U Myntri Rangbah Duh u la ban jur ïa ka jingdonkam ïa ki kor ki bor kiba khlaiñ ha ka jingai jingsumar ïa ki jingpang kiba jur. Da kaba kdew ïa ka jingpeit bniah jong ka Sorkar, u Myntri Rangbah Duh u la pyntip ba palat 1.5 lak ki health centre ki dei kiba dang wanrah hajan ki ïing briew ha kylleng ka ri khnang ban pynbiang ïa ki lad leh test bad ka first aid.
U la ong ruh ba ki lad ban peit ïa ki jingpang kiba jur kum ka diabetes, cancer bad ki jingpang kiba ïadei bad u klongsnam ki dei ki ban wanrah ha kine ki centre.
U Myntri Rangbah Duh u la ong ba na ka bynta ka jingai jingsumar ïa ki jingpang kiba jur ka la wanrah ïa ki hospital kiba thymmai bad la plie shibun ki lad ïa kito kiba trei ha ki kam lajong kiba ïadei bad ka koit ka khiah, ki nongbei tyngka bad kito kiba la pyntbit ha ka kam.
Ha kaba ïadei bad ki briew kiba trei ha kine ki kam, u Myntri Rangbah Duh u la pyntip ba la plie palat 260 tylli ki medical kolej kiba thymmai ha kine ki snem ba la dep. Kane ka la kyntiew arshah ïa ki medical seat ha ki course graduate bad post graduate haba ïanujor bad u snem 2014.
U Myntri Rangbah Duh u la kdew sha ka jingpeit bniah ïa ki kam nurse ha ka mang tyngka mynta u snem. “Ka jingplie ïa 157 tylli ki nursing kolej hajan ki medical kolej ka dei ka sienjam kaba heh na ka bynta ki briew kiba trei ha ki kam ai jingsumar. Kane ka lah ban ïarap ban pyndap ïa ka jingdonkam nongsumar ha kylleng ka pyrthei, ym tang hapoh ri,” u la bynrap.
U Myntri Rangbah Duh u la kdew sha ka bynta jong ka teknoloji ha ka jingplie lad ïa ki kam ai jingsumar bad ka jingpynduna dor ïa ki bad u la batai bniah shaphang ka jingpeit bniah ka Sorkar ïa ka jingpyntreikam ïa ka teknoloji ha kine ki kam.
“Ngi kwah ban ai lad jingsumar ha ka por kaba biang ïa ki briew lyngba ka Digital Health ID. 10 klur ngut ki briew ki la ïoh jingmyntoi teleconsultation lyngba ki skhim kum ka e-Sanjivini”, u la ong. Ka 5 G ka la plie ïa ki lad kiba thymmai ha kine ki kam na ka bynta ki startup.
Ki drone ki la wanrah ïa ki jingkylla kiba heh ha ka jingpynpoi ïa ki dawai bad ki jingleh ïa ki test. “Kane ka dei ka lad kaba biang bha ïa kito kiba seng kam lajong bad kan pyntyllun shakhmat ïa ki jingpyrshang jong ngi ban pynbiang lad jingsumar ïa baroh,” u la ong da kaba kyntu ïa ki nongseng kam lajong ba kin kiar ïa ka jingwanrah nabar ri ïa kano kano ka teknoloji.
U Myntri Rangbah Duh duh u la batai ïa ki jingdonkam na ki jaka sumar ha kane ka kam. U la ïathuh shaphang ki skhim kiba thymmai kiba ïadei bad ki tiar ai jingsumar. U la kren shaphang ki Bulk drug park, ki medical device park, palat 30 hajar klur ha ki skhim PLI bad u la ong ba ha kine ki snem ba la dep ka la don ka jingkiew kaba 12 – 14 per cent ha ki tiar ai jingsumar.
U la ong ba kane ka ïew ka dang poi sha ka T. 4 lak klur ha kine ki snem ban wan. U Myntri Rangbah Duh u la ong ruh ba ka India ka la sdang treikam ha ka jingpyntbit ïa ki briew ha ki kam medical teknoloji bad ka jingshna ïa ki tiar kiba bha bad ka jingwad bniah.
U la ong ba ha ki jaka pule kum ki IIT, yn don ka jingai jinghikai ha ka biomedical engineering. U la kyntu ïa ki nongïashim bynta ba kin wad ïa ki lad ïatrei lang ka sorkar bad ki karkhana bad ki riewshemphang.
U la kren shaphang ka jingskhem jingmut shuh shuh ki kam shna dawai ha India ha kaba u la ban jur halor ka jingdonkam ban shim kabu ïa kane bad trei ban pynneh ïa kane ka nam.
U la pyntip ba yn sdang ïa ka prokram kaba thymmai ban kyntiew ïa ka jingwad bniah bad ka jingsaiñdur thymmai ha ki kam shna dawai lyngba ki centres of excellence ka ban pynkhlaiñ ïa ka ïoh ka kot bad plie lad ïoh kam thymmai. “Ka jingheh jong ka ïew shna dawai ha India ka long 4 lak klur mynta,” la ong u Myntri Rangbah Duh.
U la ban jur halor ka jingdonkam ban don ka jingïatreilang hapdeng ki kam shimet bad ki riewshemphang namar kane ka lah ban kyntiew ïa ka jingheh ka iew sha palat 10 lak klur.
U Myntri Rangbah Duh u la ai jingmut ïa ki kam shna dawai ba kin wad ïa ki jaka ba kongsan na ka bynta ka jingbei tyngka. Da kaba kdew sha ki sienjam jong ka sorkar na ka bynta ka jingwad bniah ha kine ki kam, u Myntri Rangbah Duh u la pyntip ba la plie shibun ki lab thymmai da ka ICMR.
U Modi u la kren shaphang ki jingmyntoi kiba la wan na ki jingpyrshang ka sorkar na ka bynta ka jingai jingïada bad jingsumar. U la kren shaphang ka Swacch Bharat Abhiyanna ka bynta ka jingkhuid.
Ka Ujjwala Scheme na ka bynta ki jingpang kiba ïadei bad ka tdem, ka Jal Jeevan Mission ban ïada na ki jingpang kiba pur lyngba ka um bad ka National POSHAN Mission kaba peit ïa ka anemia bad ka jingbym ïoh ïa ka bam kaba tei.
U la kren ruh shaphang ka bynta jong ki kew-Shri Anna ha ka International Year of Millets. Kumjuh, ka PM Matru VandanaYojana, Mission Indradhanush, Yoga, Fit India Movement, bad Ayurveda ki dang ïada ïa ki briew na ki jingpang.
Da kaba kdew sha ka jingsengia ka global centre for traditional medicine hapoh ka WHO ha India, u Myntri Rangbah Duh u la ban biang ïa ka jingkyntu jong u na ka bynta ka jingwad bniah ha ki kam Ayurveda.
U Modi u la ban jur halor ki jingpyrshang jong ka sorkar ha ki kam ai jingsumar katkum ka juk mynta bad ka jingpyntbit ïa ki briew bad u la ong ba ki jinglah treikam kiba thymmai kim sahkut tang ha ki kam ai jingsumar ïa ki briew jong ka ri hynrei ki lah ruh ban pynkylla ïa ka ri sha ka jaka jngohkai ha kaba ïadei bad ki kam ai jingsumar. U la ong ba kane ka jait jngohkai ka dei ka ïew kaba heh bha ha India bad ka la sdang kylla ruh sha ka lad ban plie lad ïoh kam ha ka ri.
Ha ka jingpynkut ia ka jingai jingkren, u Myntri Rangbah Duh u la ban jur ba ki kam ai jingsumar kiba la kiewshaphrang ki dei kiba lah ban don ha India tang lyngba ka Sabka Prayas (jingtreilang jong baroh) bad u la kyntu ïa kito kiba don bynta ha kane ka kam ba kin ai ki jingmut jong ki.
“Ngi dei ban lah ban pyntreikam ïa ki jingbuh ha ka mang tyngka ha ka por ba la mang na ka bynta ki jingmyntoi ba ngi thmu da ka rukom pynkhreh kam kaba khlaiñ. Ka jingpynurlong ïa baroh ki jing thmu shuwa ka mang tyngka ka ban wan ha ryngkat ka jingïatrei lang jong baroh kiba don bynta ha kane kan donkam ïa ka jingshemphang jong phi,” u la ong ïa ki nongïashim bynta.

Leave A Reply

Your email address will not be published.