Shillong, Lber, 08: Ki khynnah skul kiba ïakhun ïa ka eksamin Higher Secondary School Leaving Certificate (HSSLC) 2023 la bthah ba ki donkam ban thoh ïa ka Common University Entrance Test (CUET) lada ki dang don jingthmu ban bteng ïa ka jingpule ha ki Central University na ka bynta ka Undergraduate.
Ha ka jingpynbna ba la pyllait da ka Meghalaya Board of School Education (MBOSE) ka la bthah ïa baroh ki bor pynïaid jong ki shlem pule ba kin pynbna ïar sha ki khynnah skul halor kane ka jingbthah khnang ba kin ym duh ïa ka lad ban thoh ïa ka eksamin CUET.
Ha u snem baladep, ka Sorkar Jylla ka la kyrpad ïa ka Sorkar Pdeng ban pyllait noh tang ïa ki Kolej ki bym pat ïoh jingïarap na ka Sorkar, ki kolej Private bad ki Kolej kiba shu ai jingkyrshan da ka Sorkar Jylla kiba don ha Meghalaya na kaba thoh ïa ka eksamin CUET.
