Shillong, Lber 08: Ki lai tylli ki party kiba la rai ban shong ha ka Liang Pyrshah kat haduh kane ka kynti kaba mynta kim pat lah ban rai ïano kin sei kum u Nongïalam ka Liang Pyrshah hapoh ka Meghalaya Legislative Assembly.
katkum ki kyndon, u nongïalam ka Liang pyrshah u dei ban wan na ka party kaba jop ym duna ïa 10 ki MLA lane (shi bynta na ka 60 ngut ki dkhot ka Assembly).
Hynrei kumba long mynta ki party ba don ha Liang Pyrshah kata ka Congress bad ka Trinamool Congress (TMC) ki don mar 5 ngut ki dkhot katba ka Voice of the People Party (VPP) ka don saw ngut kaba mut ym don ruh kawei ka party kaba kynjoh sha u nomber ban ïoh sei ïa u nongïalam ka Liang Pyrshah.
Haba kylli, Nongïalam ka Congress Legislative Party (CLP) u Bah Ronnie V Lyngdoh u la ong ba ïa kane ka mat yn lah ban ïakren tad ynda la dep ban jied ïa u Lamphang ka Ïingdorbar.
“Kum ki party ba don ha ka Liang pyrshah ngin ïakynduh lang ban ïa pyrkhat ïa ki buit kummo ban rah ïa ki mat ïatai ha Assembly,” ong u Bah Ronnie.
“Ka shong ha u Lamphang namar u don la ka iktiar halor kane ka bynta lada dei ba u kwah ban ai jingithuh ïa ngi kum ka Liang Pyrshah ban ban ithuh ïa uwei na pdeng jong ngi kum u Nongïalam Liang Pyrshah wat la ngim kot ïa u nombor ruh ka dei beit ha u ban rai. Lada u bud beit ïa ka rule ym don hi mano mano ba lah ban leh pyrshah lada u ai jingithuh ruh ka biang lada um ai ruh aiu shuh ngin lah ban leh,” jubab u Bah Ronnie.
Lah ban kdew hangne ba u Lamphang ka Ïingdorbar ha u snem 2013 u AT Mondal u la ai jingithuh ïa u Dr Donkuar Roy kum u Nongïalam ka Liang Pyrshah wat la ka UDP ha kato ka por ka ïoh tang 8 ngut ki dkhot.
