Shillong, Lber 08 : Ka shuki CEM ha Khasi Hills Autonomous District Council ka lah ban shah pynkhih hadien ba ka jingthaw ïa ka sorkar ba thymmai ha ka jylla ka la dep lut nadong shadong.
Ki tyllong ba ïajan, ki ïathuh ba lada jia ba ym don ba pynkhih ïa ka shuki CEM hynrei ka lah ban don pat ka jingbate kam thymmai ïa ki Executive Member.
Barabor hi ka ju jia beit ba hadien ba la wan da ka sorkar ba thymmai ha ka jylla, ka Council kaba nyngkong kaban khih kan dei beit ka KHADC. Kumta, mynta ka kynti ruh kan jïa biang wat lada kam dei ka jingpynkhih ïa ka shuki kaba heh hynrei kan don beit ka jingpynkhih ïa ka shuki EM, ong ki tyllong khubor bym kwah ban pynpaw kyrteng.
Kumba long mynta hi ïa ka shuki CEM ha KHADC la bat da u Bah Titos W Chyne ba dei u MDC na Sohra.
La ïoh jingtip ruh ba watla katei ka jingïakren ka la mih hynrei kam pat dei satia pat kaba la poi haduh ki nongïalam ka party namar bun ki dang don ha jingthaw ïa ka sorkar ba thymmai.
Haba pyrshang pat ban ïa kren bad ki katto katne ki MDC na ki party kiba don ha ka Liang Synshar kim shym la treh ban kren ei ei halor kane.
Ka KHADC kadei ruh kawei na ki Council kaba don haduh 19 ngut ki MDC kiba aireng ha kane ka elekshon MLA kaba dang shu lah shen. Hynrei napdeng kitei, kiba jop pat ki don tang san ngut, kata arngut na ka UDP ba kynthup ïa u Executive Member ka Council Bah Paul Lyngdoh bad u Bah Pius Marwein na Ranikor. Katba na ka Congress pat ki don lai ngut kata u Bah Ronnie V Lyngdoh MDC ka Mylliem, Bah Gabriel Wahlang MDC ka Nongstoiñ bad Bah Charles Marngar MDC ka Mawhati.
Nalorkata, ki don ruh bun ngut bha ki MLA kiba ïakhun ïa katei ka elekshon hynrei ki shah rem noh. Kine ki kynthup ïa u Bah Lambor Malngiang jong ka UDP na Nongkrem, Bah Pynïaid Syiem jong ka NPP na Mawryngkneng bad u Bah Gigur Myrthong na Mawshynrut.
Haba phai pat sha ka jingbun paid, ka NPP ka don mynta 12 ngut ki MDC, bud sa ka UDP 9 ngut, Congress 6 ngut, nangta HSPDP marwei, bad ruh u MDC ka Nongthymmai, Bah Latiplang Kharkongor nalor u MDC shusieh Bah Bindo M Lanong.
