Nongpoh, Rymphang, 18: Ki ar ngut shi paralok watla ki don hapdeng ka jingduna ha liang ka dkhot met ba kim lah ban ïaid ban ieng kumba long lem kiwei kiba biang ha ka dkhot met bad kum kita ki ba duna ha ka dkhot met ki la pyni pat ïa ka nuksa kaba bha tam sha kiwei halor ka jinglong paralok ba kyrpang ba ki da don kata ka por ban ïa kren ne ïa kynduh ban ïa kren ne phylliew jingmut halor ka longbriew ka manbriew.
Kine ki ar ngut shi paralok kiba la pyni ïa ka nuksa kaba bha tam sha ka imlang ka sahlang ki kynthup ïa u Samla Pering Pale na ka Shnong Umpowin bad u samla Philbet Hanse na ka Shnong Kharpati ha Ri Bhoi. Kine baroh ar ngut ki don ka jingduna ha ka liang ka dhot met ba kim lah ban ïaid ban ieng kumba long lem kiwei kiba biang ka dkhot met.
U samla Philbet Hanse lei lei um lah ban ïaid ban ieng, ha kaba u hap ba shu par bad u hap ruh ban pyndonkam da ka kali ba ju pyndonkam kiba duna dkhot met bad u samla Pering Pale pat u lah ban ïaid bad jynjar pat ban leit ban wan na ka daw ba don ka jingduna ha baroh ar tylli ki kjat.
Kaei kaba kine ki ar ngut ki pyni sha ka pyrthei ba ki long kiba bit ba biang ha ka dkhot met, ka dei ka jingïaieit ïa thoiñ bad ka jingdon ïa kata ka por ba ïa phylliew jingmut na ka por sha ka por kum kita ki para ba duna ha ka dkhot met.
Ha kum kane ka pyrthei ïa beh spah ïa beh rongphong bad ka pyrthei ïa bun kam, la ñiar ban don kum ka mynsiem jong kine ki ar ngut shi paralok, ha kaba wat la ki ïa sah jngai na kawei ka shnong sha kawei ka shnoing, hynrei ym tang ba ki ju ïa kren lyngba ka phone halor ki kam ki jam jong ki, hynrei ki da don ruh kata ka por ban ïa kynduh kyrpang kum shi paralok ban ïa kren ïa ka bha ka miat jong ki kum kita ki para ba duna ka dkhot met.
Kaba kham sngewlyngngoh ruh ba kine ki ar ngut wat la ki la sah jngai kata naduh na ka shnong Umpowin haduh ka shnong Kharpata ha Ri Bhoi ka don 77 km ka jingjngai, hynrei ki don pat kata ka por ban ïa kynduh lang kum kata ka jingïaieit paralok kaba ki dang dep ban ïa kynduh dang ha ka 13 tarik u Rymphang 2024..
Haba la ioh ban ïa kren bad u samla Pering Pale, u la ïathuh ba kane ka jingleit ïa kynduh kum shi paralok ka dei ka dak jong ka jingïaieit shi paralok, ha kaba ki ju ïa phone na ka por sha ka por lyngba ka phone bad kim hun pat tang ban ïa kren da ka phone halor ka jinglong paralok bad ki da buh da ka por ban ïa kynduh kyrpang shi bynta ban ïa phylliew jingmut halor ki kam ki jam khamtam kum kita kiba don ka jingduna ha ka dkhot met.
U la ong ruh haba ïa kynduh lang ka sngewkmen ka mynsiem bad ki ioh ruh shibun ka por ban ïa kren halor ka bha ka miat jong ki bad khamtam ki kam ki jam ba kumno kin lah ba ieng ha la ki jong ki kjat wat la ki dei kita kiba duna ha ka liang ka dkhot met bad kampher wat la ki pynlut por bad haba ioh ban ïa kynduh lang shi paralok ka long ka jingkmen bad ka jinghun mynsiem, u la pynpaw shuh shuh.
