Shillong, Rymphang, 18: Kum ka kynhun kaba sngewkhia halor ka jinghiar ka pule puthi khamtam haba lap ba kawei na ki daw ka long ka jingeh ha ka ïoh ka kot ki kmie ki kpa kaba poi sha u pud ba ki khun ki hap ban sangeh pule noh shiteng por, ka Khasi Students Union Umrynjah Unit ka la shim da ka sienjam ban leh eiei khyndiat halor kane ka bynta.
Ka seng ka la leit ban ai jingïarap ïa ki khynnah kiba wan na ki longiing ba duna ka ïoh ka kot kiba sah ha ka shnong Umjynjah kaba dang hap ha Mawlai Constituency da ka jingsakhi lang jong ki nongïalam ka KSU Mawlai Circle, ka KSU Umrynjah Unit. La sam da ki kopi bad ki tiar ban pyndonkam ha skul sha ki 60 ngut ki khynnah ha ka shnong Umrynjah.
Ki nongïalam ka seng ki la bynniaw halor ka jingbym lah jong ka Sorkar ban pynbiang ki tiar skul ïa ki khynnah bad ka seng kam banse ban noh synñiang watla la i long i barit.
Ka KSU ka ngeit skhem ruh ba kine ki khynnah kiba ïoh ïa kine ki jingïarap kin ym iehnoh ïa ki jingpule hynrei ka kyrmen ba kin minot thop khnang ba lashai kin long ki khlur ba tyngshaiñ jong ka jaidbynriew.
Lyngba kane ka sienjam kaba rit, ka KSU ka kyrmen ruh ba ha kawei ka sngi yn sa lah ban rat dyngkhong ïa ka jingieh noh shiteng por ïa ka jingpule, ong u kyrwoh ba la pyllait da u Publicity Secretary ka KSU Mawlai Circle samla Gary Mawlieh.
