Nongpoh, Rymphang, 18: Hadien ba la wan poi mynta ka step ïa ka met ba dangsah jong u Officer Incharge ka Byrnihat Out Post, u Amit Sinha, uba la duh ïa ka jingim na ka jingaksiden Kali ha Gurgaon, Haryana na ka liang ka ïing ka sem ki la pyndep noh ïa ka jinglehniam ba khatduh ha ka sngi u Blei.
Kum ban pynkynmaw, une u Sinha u la duh noh ka jingim na ka daw ka jingaksiden kali ha Gurgaon, Haryana ha ka step sngi Saitjaiñ katba u la leit donkam ha Delhi na ka bynta ki kam ophis ba la bynshet da ka tnad Oulit ka jylla.
Dei hadien ba ka met jong u ka la wan poi noh mynta ka step Sngi u Blei, ki bahaing hasem bad ki lok ki jor ki la leh burom khatduh ïa ka met ba dangsah ha ka ïingsah jong u ha Dakhingoan, Kahilipara, Guwhati bad hadien ka lehniam leh rukom na ka ïingsah jong u, la leit ban thang noh ïa ka met sha ka jaka leh niam thang metiap briew kaba don ha ha Kamakya, Assam.
Ha kane ka jingleh burom ïa ka met ba dang sah, la don lang ruh naduh u SP ka Ri Bhoi u Jagpal Singh Dhanao, u Deputy Commissioner ka Ri Bhoi, u Arpit Upadhaya, u SP barim ka Ri Bhoi u Giri Prasad bad kynthup kiwei kiwei ki heh ophisar pulit bad na ka liang ka tnad pulit Ri Bhoi ki la leh burom ruh ïa une u Pulit ophisar da kaba pynlong ïa ka Salami ha ka ka jinglehniam kaba ki pynlong ha ka ïingsah jong u.
Kum ban pynkymmaw, une u pulit ophisar, u Amit Sinha u la shakri ha Ri Bhoi la kham bun snem bad u la bat ruh kum u incharge ka PIC Khapmara, Byrnihat bad u dang shen u la shah pynkynriah kam sha ka ophis u SP ha Ri Bhoi hadien ba la bat kum u Pulit ophisar ka Byrnihat Police Outpost.
