Nongpoh, Risaw 16: U MLA ka Mawhati u Bah Charles Marngar mynta ka sngi u la ïoh ban aiti da ki iing ba paka sha 2 tylli ki longiing ba duk ba jynjar ha ka shnong Nongjri Ummawbuh bad ha ka shnong Sohpdok, bad ïa kitei ki 2 tylli ki iing u Bah Charles u la pynshna da ka tulop MLA lajong, kum ka jingsnohkti lang na ka bynta ka bit ka biang jong ki paidbah kiba shem lanot.
Ïa ka iing ha ka shnong Nongjri Ummawbuh la aiti sha ka kong Medalin Lamare bad u kurim jong ka u Bah B Shylla kiba don ruh 6 ngut ki khun, kiba baroh shi katta ki im hapdeng ka jingduk jingkyrduh bad ka iing sah kaba jot rathai hynrei dei da ka jingshimkhia u MLA la lah ban pynshna pat da ka iing ba paka ba kin ïoh ban shong ban sah bad lait na ka sngi u slap.
Sa kawei pat ka iing ba la ïoh ban aiti ha katei ka sngi ka dei ha ka shnong Sohpdok kaba dei ka iing jong ka kong Banriburom Kharkongor bad u kurim jong ka u Bah A Kurka lang kiba don ruh 3 ngut ki khun rit kiba la im sohsat baroh shi katta hapdeng ka jingduk jingkyrduh.
Kitei ki 2 tylli ki longiing ki la pdiang da ka jingieid ïa katei ka iing ba la aiti da u MLA ryngkat ki ummat jingkmen kiba tuid na ki khmat namar kim poi pyrkhat ban ïoh ban shong ban sah ha ka iing kaba paka bad kaba itynnad.
Haba kren ha kane ka sngi u Bah Charles Marngar u la ong ba ka jingïarap ïa kiba duk bad kiba duna ka jingïoh ka dei ka jingmutdur ha ka jingim jong nga bad kane ka iing ba la dep shna bad aiti sha kitei ki longiing kam dei tang ka jaka rieh na ka sngi u slap, hynrei ka jingkyrmen, bad ka jingïeid ka ban neh shirta, ryngkat ka jingkitbok ïa kitei ki longiing ba kin dang ïoh ka met kaba koit ba khiah bad ka jingim kaba dap kyrhai.
Halor katei ka jingïohpdiang ïa kitei ki iing thymmai, na ka liang kitei ki 2 tylli ki longiing ki la ai ka jingkhublei ba kyrpang ïa u MLA ka Mawhati u ba la shimkhia ban pynshna na ka tulop lajong ba kin ïoh ka jaka rieh bad ka jaka shong jaka sah hadien ba bun snem ki la mad jingeh bad hap ban sah ha ka iing ba jot rathai, ryngkat ka jingkitbok ba kum u MLA un dang lah ban trei bad shakri bha ïa ka dong ka thaiñ khamtam kiba duk ba rangli ryngkat ka met ba koit ba khiah.
